Шымкентте көпқабатты тұрғын үйлердің сейсмикалық жұмыстарына биыл 886,8 млн. теңге бөлінді.
Биыл Шымкент қаласы аумағындағы 12 көпқабатты тұрғын үйдің сейсмикалық күшейту жұмыстарына 886,8 млн. теңге бөлініп, жұмыстар жүргізілуде.
«Жыл соңына дейін құрылысты аяқтауды жоспарлап отырмыз»,- дейді қалалық энергетика және коммуналдық шаруашылық басқармасы басшысының міндетін ақтарушы Нұрлан Жаманкөз.
«Сонымен қатар, 158 көпқабатты түрғын үйлерге техникалық зерттеу жұмыстарын жүргізуге 119,697 млн. теңге бөлінді. Мемлекеттік сатып алу конкурсы арқылы мердігерлер де анықталды. Құрылыс жұмыстарын жүргізу барысында «Жұмыспен қамту Жол картасы-2020″ бағдарламасы аясында жалпы 144 адам жұмыспен қамту көзделуде»,- дейді басқарма басшысы.
Еске сала кетейік, төтенше жағдай аяқталған соң Мемлекет басшысы Қасым-Жомарт Тоқаевтың тапсырмасымен жаңа Жұмыспен қамту жол картасы іске қосылып, жүзеге асырыла бастады. Оған қаралған қаржы да қомақты – 1 триллион теңге.
“Шымкенттегі жұмыссыз азаматтарды «Жұмыспен қамтудың жол картасы», «Еңбек» бағдарламаларына белсене қатысуға шақырамыз. Қалада құрылыс, тұрғын үй-коммуналды шаруашылық, автомобиль жолдары салаларында көптеген жоба жүзеге асырылуда”,-дейді Шымкент қаласы әкімдігінің халықты жұмыспен қамту орталығының директоры Дархан Беласаров.
