Бүгінде Түркістан өңірінде екі миллионнан астам халық өмір сүріп жатыр. Сәйкесінше, тұрғындар үшін жайлы өмір сүру ортасын қалыптастыру мақсатында қарқынды жұмыстар жүргізілуде. Соның бір бағыты – күнделікті тұрмыста қажетті жұмыстарды цифрландыру. Бұл бағыт бойынша соңғы уақытта ауқымды істер атқарылып, ел игілігі молая түсуде.
Жалпы, жоспар бойынша елімізде жасанды интеллект саласында жыл сайын 1000 маман дарялануы керек. Жасанды интеллект саласында жыл сайын 100 стартап іске қосу бойынша міндет қойылып отыр.
Денсаулық саласын цифрландыруға тоқталсақ, мәселен, біраз уақыт бұрын денсаулық сақтау министрлігінің өкілдері емханалар мен ауруханалардағы кезек проблемасын шешудің жолдарын айтып, қазір бейресми кезек көп орын алатындықтан пациенттер өз кезегінің қашан келетінін біле алмай жүргенін жеткізді. Осы орайда медициналық мекемелердегі көптеген бейресми кезектер цифрландырылмақ. Осылайша цифрлық сервистер арқылы халықты ақпараттандыру ашық болады. Министрлік ақпаратына сүйенсек, пациенттерге кейбір медициналық қызметтер бойынша ақпарат SMS хабарлама арқылы жеткізіледі. Олар – пациенттің стационардан шығарылғандығы туралы; амбулаториялық дәрі-дәрмекпен қамтамасыз ету шеңберінде рецепт жазып беру; жүкті әйелдерді жоспарлы емдеуге жатқызу мерзімі; жүкті әйелдер үшін жоспарлы қарап-тексерудің жоспарланған күні туралы және медициналық ұйымға тіркелудің өзгеруі туралы хабарламалар.
Айта кетсек, биыл Қазақстанда дәрі-дәрмектерді қадағалау бойынша ақпараттық жүйе мен балабақшаға кезекке тіркеудің Бірыңғай деректер базасы іске қосу жоспарланған еді.
Дәрілік заттарды қадағалау жүйесі бірнеше мәселені бірден шешуге ықпал етеді. Атап айтқанда, медициналық ұйымдарда дәрілік заттарды қайта жазу және өтірік есептен шығару мүмкіндігін жойып, дәрілік заттардың бөлшек саудадағы бағасына, қалдықтарына және жарамдылық мерзімдеріне мониторинг жүргізеді.
