Мемлекет басшысы Қасым-Жомарт Тоқаев «Әділетті Қазақстанның экономикалық бағдары» атты халыққа Жолдауында елімізді ІТ мемлекетке айналдыру біздің маңызды стратегиялық міндетіміз екенін атап өтті.
Президент сыбайлас жемқорлықпен ымырасыз күресу мемлекеттік саясаттағы негізгі басымдықтың бірі екенін атап көрсетіп: «Заң үстемдігін орнатып, нағыз құқықтық мемлекет құру үшін, ең алдымен, жемқорлықтың тамырына балта шабу керек» деген болатын.
Бұл орайда, Әділет министрлігі меншік иелері бірлестіктерін цифрландыру қызметін құру және оны тіркеу шеңберінде электрондық дауыс беру бойынша қанатқақты жобаны жүзеге асырып келеді. Жаңа сервис өткен жылдың 12 қыркүйегінен бастап іске қосылды. Қазіргі уақытта 200-ден аса бастамашыл топ өз өтініштерін ұсынып, олардың 25-і электронды түрде тіркелді. Жоба меншік иелері бірлестігі қызметінің ашықтығын арттырып, алаяқтық әрекеттердің тәуекелдерін азайтуға және жиналыс хаттамаларында тұрғындардың қолдарын бұрмаламауға мүмкіндік береді. Сондай-ақ үйді басқару үдерістерін автоматтандырып, қағазбастылықтан арылтады.
Сондай-ақ 2023 жылдың мамыр айында еліміздің үш өңірі Астана, Шымкент қалалары мен Түркістан облысында жеке сот орындаушыларды, нотариустарды, адвокаттарды, сот сарапшылары мен патенттік сенім білдірілген өкілдерді аттестаттаудан өткізу бойынша қанатқақты жоба іске қосылды. Ауызша әңгімелесудің комиссиялық кезеңі компьютерлік ситуациялық кейстерге ауыстырылып, жалпы аттестаттау рәсімінің ашықтығын арттырып, адами факторды жойды. Бұл жобаның сәтті іске асқанын атап өткен жөн. Қанатқақты режімде іске қосылған сәттен бастап 700-ден аса кандидат тіркеліп, олардың 200-ге жуығы аттестациядан өтті. Осындай оң нәтижені ескере отырып, қанатқақты жобаны еліміздің барлық аймағында іске қосу жұмысы жүргізіліп жатыр.
