Елімізде 2017 жылы «Цифрлы Қазақстан» мемлекеттік бағдарламасы басталғалы бері цифрландыру мәселесі қарқын ала түскені белгілі. Сонан бері қарайғы 7 жылдың ішінде бірнеше саланың жұмыстарында көптеген өзгерістер орын алды. Бұл әсіресе халықты құжаттандыру саласында айрықша көрініс тапты. Ал құқықты қамтамасыз ету, азаматтардың қауіпсіздігін қорғау жағында өте зор ілгерілеушіліктерге қол жетті.
Өткен жылғы цифрландыру саласындағы елеулі жаңалықтардың бірі – электрондық цифрлық қолтаңбаны (ЭЦҚ) телефон қосымшасы арқылы алуға болатындығы. Сәйкесінше, қазір ЭЦҚ алу үшін Халыққа қызмет көрсету орталығына барудың қажеті жоқ. «Мобильді ХҚО» қосымшасында ХҚО операторымен бейнеқоңырау арқылы байланысып, ЭЦҚ-ға үйден шықпай-ақ тапсырыс беруге болады.
Ал, оған дейін компьютері жоқ қазақстандықтарға ЭЦҚ алу үшін Халыққа қызмет көрсету орталығына баруға тура келетін. Халықтың өтінішіне құлақ асып, Мемлекеттік корпорация жеке және заңды тұлғалар үшін «Мобильді ХҚО» қосымшасында ЭЦҚ алу мүмкіндігін енгізді. Ол үшін қосымшаға кіріп «бейне қызметі» батырмасын бассаңыз жеткілікті. Оператордың қосылуын күтесіз, ол жеке куәлік пен SMS арқылы келген кодты сұрап, өтінімді қабылдайды.
Жалпы, Қазақстандағы цифрландырудың көлемі мен сапасы қандай екенін коронавирус дағдарысы анық байқатты. Елімізде электронды цифрлық қолтаңбаларды оңтайлы тіркеу және әлеуметтік төлемдерді беруді ұйымдастыруға мемлекеттік қызметтердің мүмкіндігі жеткілікті болды. Бірақ эпидемияға қарсы шараларды әзірлеу және тұрғындардың мәліметтерді пайдалануы жеткіліксіз болып шықты.
Жоспар бойынша елімізде жасанды интеллект саласында жыл сайын 1000 маман дарялануы керек. Мемлекет басшысының айтуынша, алдағы уақытта кейбір отандық жоғары оқу орындарында «Google» және «Huawei» халықаралық компанияларының тиісті курстары өтпек. Корея мен Қытайдың жоғары оқу орындарымен білім беру және мамандарды бірлесіп даярлау бойынша келісім жасалды.
