Елімізде компьютер мен ноутбук құрастыру көлемі бір жылдың ішінде 4,4 есе артқан. Бұл туралы Energyprom.kz ресурсының сараптамасында айтылған.
«Қазақстанда компьютер мен ноутбук өндірісі бір жылда 4,4 есе артып, 2024 жылдың қаңтары мен ақпанында 6,1 мың данаға жетті. Бұл — 2013 жылдан бергі ең үлкен көрсеткіш. 2013 жылдың қаңтары мен желтоқсанының арасында сектордағы өндіріс көлемі 83,4 мың дана болған еді. 10 жыл өткеннен кейін бұл көрсеткіш 11,7 мың ғана болды» деп жазылған сараптамада.
Материал авторы бұл мәлімет ресми статистикада отандық өндіріс ретінде сипатталғанымен іс жүзінде құрастыру көлемі ғана екенін ескертеді.
«Ресми статистика деректері бойынша қазақстандық зауыттар 2023 жылдың 12 айында есептеуші цифрлық машиналарға ішкі сұраныстың 23,2%-ын қамтамасыз еткен. Бір жыл бұрын бұл көрсеткіш 21% болатын. Ашығын айтайық, Қазақстанда сатылған әрбір төртінші компьютер отандық өнім дегенді елестету қиын. Біз ол жағына тоқталмаймыз, тек ұлттық статистика бюросы берген ресми деректерді ұсынып отырмыз» деп жазады Energyprom.kz.
Мемлекет басшысының айтуынша, алдағы уақытта кейбір отандық жоғары оқу орындарында «Google» және «Huawei» халықаралық компанияларының тиісті курстары өтпек. Корея мен Қытайдың жоғары оқу орындарымен білім беру және мамандарды бірлесіп даярлау бойынша келісім жасалды. Жасанды интеллект саласында жыл сайын 100 стартап іске қосу бойынша міндет қойылып отыр.
Еске сала кетсек, Президент Қазақстанға жасанды интеллектіні дамытатын тиісті институттар керек екенін атап өткен болатын. Президенттің айтуынша, елімізде жасанды интеллект қауіпсіздік жүйесі, медицина, банк қызметі, логистика, білім беру салаларына ойдағыдай енгізіліп жатыр.
“Осы технологияны меңгерген мықты компаниялар да пайда болды. Соған қарамастан, жасанды интеллект индустриясын одан әрі дамыту үшін мемлекет кешенді қолдау көрсетуі керек. Мәліметтер мен технологиялық инфрақұрылым барынша қолжетімді болуы керек. Сондықтан қолайлы экожүйе қалыптастыру қажет”, – деген еді Тоқаев.
Сонымен қатар ол Қазақстанға жасанды интеллектіні дамытатын тиісті институттар керек екенін атап өтті.
“Қазір Үкімет Жасанды интеллектіні дамыту стратегиясын және Цифрлық кодексті әзірлеп жатыр. Бұл құжаттар аталған саладағы зерттеу жұмыстарына және әзірлемелерді іс жүзінде қолдануға жағдай жасауы керек”, – деді Президент.
