Күллі әлем қазір жасанды интеллектіні толық пайдалануға, ашуға барын салып жатыр. Кейбір бағалаулар бойынша, 2030 жылға қарай бұл сала әлемдік ІЖӨ-нің 7 пайызын қамтамасыз етпек. Ал 2027 жылға таман жаһандық жасанды интеллект нарығын капиталдандыру 400 миллиард доллардан асады.
Жақында Ғылым және технологиялар жөніндегі ұлттық кеңестің отырысы өткен болатын. Мемлекет басшысы Қасым-Жомарт Тоқаев осы мәселеге байланысты Үкіметке жасанды интеллект саласын жан-жақты дамытуға тапсырма берді.
Жаһанды жаулаған жаңа сала жұмысты автоматтандыруға, оңтайландыруға, күрделі мәселелерді шешуге үлкен мүмкіндік береді. Мысалы, медицина, автомобиль өнеркәсібі, қаржы саласында жасанды интеллект үдерісті мейлінше жеделдетеді. Тіпті диагностиканың дәлдігін жақсартады, қауіпсіздікті қамтамасыз етеді.
Оның жақсылығы мен тиімділігі жетерлік. Тек қарқынды дамуына ілесе алуымыз қажет-ақ. Мемлекет басшысы елдегі осы тақырыпты бірнеше рет көтеріп, тіпті жеке өзі жетекшілік етуге, шетелдік және отандық мамандармен кездесулер өткізуге, қойылған міндеттердің орындалуын бақылауға басымдық беретінін білдірді.
– Біздің елімізде жасанды интеллект қауіпсіздік, медицина, банк қызметтері, логистика, білім беру сияқты салаларда табысты қолданылады. Осы технологияларды енгізумен айналысатын мықты компаниялар пайда болып жатыр. Сонымен қатар индустрияны табысты дамыту үшін мемлекеттің кешенді қолдауы қажет. Біз деректер мен технологиялық инфрақұрылымға ортақ қолжетімділікті қамтамасыз ететін экожүйені құруымыз керек, – деді Президент.
Айта кетейік, алдағы 22 сәуірде «Блокчейн және жасанды интеллект мектебі» «Жасанды интеллект: қазіргі заманның басты талабы» тақырыбында тегін базалық курстар мен шеберлік сағатының үшінші модулін іске қосады. Курсты ЖИ саласындағы сарапшы, «Omega Server.Inc» директорлар кеңесінің мүшесі, бірнеше танымдық кітаптың авторы Анатолий Гин жүргізеді.
