Осыған дейін Цифрлық даму, инновациялар және аэроғарыш өнеркәсібі министрлігі елімізде жасанды интеллект саласында іске асырылып жатқан жобалар жайында мәлімет ұсынған болатын. Олар: «Қазақстанда денсаулық сақтау, білім беру, құқық қорғау, смарт қалалар сияқты түрлі салаларда жасанды интеллектің алгоритмі мен технологиялары қолданылып жатқан бірқатар жоба жүзеге асырылып жатыр. Мәселен, денсаулық сақтау саласында Cerebra (инсульт белгілерін диагностикалауға көмектеседі), Aident (ортодонт дәрігерлеріне көмек), Smart ECG (электрокардиограмманы қашықтан зерттеу), PneumoNet жүйесі (өкпенің он жеті патогенді ауруын анықтау) сияқты жобалар Қазақстанда ғана емес, шет елдерде де танымал» екені айтылған.
Сонымен, «Ақылды қала» саласында TargetAI, Sergek Group және Beyne.ai сияқты жобалар жасанды интеллект технологияларын, ауқымды деректерді өңдеуді және қала сыртындағы мониторингті пайдалана отырып, бейне деректерді талдау мүмкіндігін береді.
Бұдан өзге қазір NEURON OIL бағдарлама аясында мұнай өндіруші компаниялар деректер негізінде өндіруді басқару бойынша дұрыс шешім қабылдай алады. Айта кетейік, осыған дейін аталған сала бойынша Жоғарғы Сотта бас прокурордың қатысуымен «Жасанды интеллект және үлкен деректер (Big Data) сот және құқық қорғау жүйесінде: шындық және уақыт талабы» атты халықаралық ғылыми-практикалық конференция өткені белгілі.
Іс-шараға мемлекеттік және құқық қорғау органдарының, жоғары оқу орындарының өкілдері, Парламент депутаттары, ғалымдар, Өзбекстанның, Ресей мен Беларусьтің жетекші заң университеттерінің сарапшылары қатысты. Жиналғандарды Жоғарғы Соттың төрағасы Асламбек Мерғалиев, Бас Прокурор Берік Асылов, Конституциялық Соттың төрағасы Эльвира Әзімова, ТМД елдері бас прокурорларының Үйлестіру кеңесінің атқарушы хатшысы Владимир Зимин, сондай-ақ Астанадағы ЕҚЫҰ Бағдарламалар кеңсесінің басшысы Фробарт Фолькер қарсы алды.
Конференцияға қатысушылардың өкілді құрамы, оның ішінде жетекші отандық және шетелдік мамандар мен практиктерге пікір және тәжірибе алмасуға, жасанды интеллект мүмкіндіктерін тиімді пайдалану жөнінде ұсыныстар әзірлеуге мүмкіндік берді.
Қадағалау органының басшысы талқыланатын проблематиканың өзекті екенін, құқық қолдану практикасына цифрлық технологияларды енгізу қылмыстың алдын алу, құқық бұзушылықтарды жедел ашу және объективті тергеу жөніндегі жұмыстың тиімділігін арттыруға ықпал ететінін атап өтті.
Спикерлер цифрландыру бүгінде мемлекеттік басқару жүйесін жетілдірудің жоғары сұранысқа ие және перспективалы бағытына айналғанын атап өтті.
Ғылыми-практикалық пікірталастар шеңберінде қылмыстарды тергеуде, сот ісін жүргізуде, жалпы заң практикасында, ауқымды деректерді халықаралық-құқықтық реттеуде цифрлық технологияларды (Big Data) қолдану мәселелері қамтылды.
Цифрлық технологияларды енгізу құпия мәліметтерді жария ету және оларды құқыққа қарсы мақсаттарда пайдалану тәуекелдерін болдырмау үшін адам құқықтарын сақтау және дербес деректерді қорғау мәселелеріне ерекше назар аударылады.
Киберқауіпсіздікті қамтамасыз ету контекстінде ақпараттық технологиялар саласындағы заманауи тәуекелдер мен қауіптер, корпоративтік алаяқтыққа қарсы іс-қимыл мақсатында ауқымды деректерді (Big Data) пайдалану мүмкіндіктері, «Даркнет» технологияларын пайдалана отырып жасалған қылмыстарды тергеу ерекшеліктері жан-жақты қарастырылды.
Жаңа технологиялар дәуірі дамыған заманда сарапшы мамандар мынадай болжам айтты. 10 жылдан кейін әлемдегі өнімдер мен қызметтердің 70 пайызы жасанды интеллектіні қолданатын цифрлық платформалық модельдерге негізделеді. Мұның өзі жаңа салалар мен жұмысқа орналасу мүмкіндіктерін жасайды. Жоғары білім беру жүйесі – цифрлық дәуірге, жасанды интеллектіні қолдануға сенімді түрде көшуді қамтамасыз ететін басты көпір. Ал жасанды интеллект адамдар мен заманауи құрылғылар арасындағы ынтымақтастықты кеңейтуге тың серпін береді.
