Бұл материалда Түркістан облысының тұрғындарының назарына ақпараттық қауіпсіздікті қамтамасыз ету саласында халықаралық ынтымақтастық, ғаламдық тәжірибеге сүйену өте маңызды екендігін түсіндіреміз.
Сарапшылар киберқауіпсіздікті дамыту бұл жаһандық бәсекеге қабілеттілік екенін қаузағалы да көп болды. Қазір киберқылмыспен күрес мәселесі әлем бойынша өзекті болып отыр. Осыған орай президент Тоқаев үкіметке және Ұлттық қауіпсіздік комитетіне «Қазақстанның киберқалқаны» жүйесін құру жөнінде шаралар қабылдауды тапсырды.
Жалпы, еліміздің киберқауіпсіздік жүйесі қазір қалай дамып келеді? Жаңа әлемдік сын-қатерлер аясында қандай проблемалар бар? Бүгін біз осы жағын сараптап көруді жөн көрдік.
Қазіргі уақытта Қазақстан киберқалқанын нықтау үшін 16-дан астам меморандумдар мен келісімдерге қол қойды. Олардың ішінде: іс-шараны іске асыру шеңберінде Ұлттық ақпараттық қауіпсіздікті үйлестіру орталығының компьютерлік инциденттерге ден қою қызметі Индонезия Республикасының компьютерлік инциденттерге ден қою қызметімен «id-CERT» өзара түсіністік туралы меморандумға қайта қол қойды.
Сондай-ақ киберқауіпсіздік саласындағы ынтымақтастық туралы меморандумдарға Израиль мемлекетінің ұлттық киберқауіпсіздік директоратымен, Türkmenaragatnaşyk агенттігі (Түрікменстан) жанындағы Мемлекеттік киберқауіпсіздік қызметімен, Грузия Әділет министрлігінің деректермен алмасу агенттігі-компьютерлік инциденттерге жедел әрекет ету тобымен қол қойылды. Киберқауіпсіздік тұжырымдамасы аясында арнайы іс шаралар жоспары бекітілді.
«Қазақстанның киберқауіпсіздігі» тұжырымдамасын бекітті, ол IT және телекоммуникациялар, электрондық ақпараттық ресурстарды қорғау, халық пен бизнес арасында цифрлық сауаттылықты арттыру, сондай-ақ ақпараттық-коммуникациялық технологияларды пайдалану қауіпсіздігін қамтамасыз ету саласындағы мемлекеттік саясатты іске асырудың негізгі бағыттарын айқындады. Киберқылмыс қазір әлем бойынша өршіп тұрған мәселе. Осы сәтте арнайы тұжырымдама қабылдағанымыз ұтымды шешім болды. Ақпараттық ресурстарды, жеке адамдардың мәліметін, ұлттық қауіпсіздік жүйесін сақтандыру мақсатында мұндай тұжырымдаманың болуы маңызды.
