Түркістандық оқырмандарымыз үшін Қазақстандағы киберқалқан жөнінде мәліметтерді ұсынамыз. Киберқылмыстардан келетін қауіптер пен қатерлер ауқымы туралы түсінік біздің мемлекетімізде бүгін ғана қалыптасқан жоқ. Сарапшылардың бағалауынша, әлемдік экономикаға интернет-қылмыстың тигізген зардабы тек 2016 жылы ғана 500 миллиард АҚШ долларынан асып түскен. Алдын ала болжамдар бойынша, бұл көрсеткіш таяудағы жылдарда өсе бермек. Былтырғы жылы алғаш рет беделді Allianz Global Corporate & Specialty нұсқасы бойынша киберқылмыстар бизнес жүргізудің басты қауіптері мен тәуекелдерінің үштігіне кірді. «Касперский лабораториясы» қазіргі уақытта интернетке қосылған әрбір үшінші дербес компьютер зардап шегеді деп санайды. Тұжырымдама міндеттерін іске асыру мынадай үш бағыт бойынша дамуды талап етті: – заңнамалық және нормативтік-әдістемелік; – ұйымдастырушылық-басқарушылық және ұйымдастырушылық-техникалық; – кадрлық. Тұжырымдаманы бекіткеннен бергі аралықта осы бағыттардың барлығы бойынша нәтижелі жұмыстар жүргізілді. Бұдан құқық қорғау жүйесі де тысқары қалған жоқ. Атап айтқанда, діни экстремизм мен терроризм идеяларын насихаттауды анықтау мен оның жолын кесу мақсатында интернет-ресурстарға тұрақты түрде мониторинг жүргізу өзінің нақты әрі жоғары тиімділігін көрсетті.
Мемлекет басшысының «Қазақстанның Үшінші жаңғыруы: жаһандық бәсекеге қабілеттілік» атты Жолдауында да діни экстремизм мен терроризмге қарсы күресті басты назарда ұстау атап көрсетілді.Ақпараттық-байланыс желілеріндегі арандатушылық, жалған ақпарат үшін қылмыстық жауапкершілік енгізу және тыйым салынған ақпаратқа қолжетімділікті тұйықтау тетігін заңнамалық тұрғыда белгілеу – «Қазақстан киберқалқаны» жүйесінің маңызды элементтері болып табылатыны сөзсіз. Олар киберқылмыстардың әрқилы көріністеріне қарсы тұруда өзінің тиімділігін іс жүзінде дәлелдеді.