Ұлттық жобаның берері мол

93

Осыдан бірер жыл бұрын Қазақстан Үкіметі 2021-2025 жылдарға арналған «Цифрландыру, ғылым және инновация арқылы технологиялық серпіліс» атты ұлттық жобаны қабылдаған болатын. Мұндағы мақсат – Қазақстанды цифрлық трансформация арқылы тиімді мемлекеттік басқаруы бар заманауи ел ретінде қалыптастыру, сенімді деректер негізінде шешімдер қабылдау, сонымен қатар цифрлық дәуірде инфрақұрылымды тиімді және қауіпсіз пайдалануды қамтамасыз ету, ғылымның әлеуметтік-экономикалық дамуға қосқан үлесін арттыру.

Атап өтсек, аталған жобаны Қазақстан Республикасы Цифрлық даму, инновациялар және аэроғарыш өнеркәсібі министрлігі мен Қазақстан Республикасы Білім және ғылым министрлігі біріге әзірлеген.

Сонымен қатар, ҚР Цифрлық даму, инновациялар және аэроғарыш өнеркәсібі министрінің сол кездегі мәлімдемесіне сүйенсек, бұл жоба Мемлекет басшысының Жолдауы аясында айтылған тапсырмасына сәйкес әзірленіп, бекітілген. Министрдің айтуынша, ұлттық жоба 10 бағыттан, 226 тапсырмадан, 44 көрсеткіштен және 211 іс-шарадан тұрады, оларды іске асыру 2025 жылға дейін жоспарланған. Ұлттық жоба екі блокқа бөлінген: «Цифрлық трансмормация» және «Ғылым» блогы. Оның ішінде «Цифрлық трансмормация» блогы мемлекеттік қызметтерді 5 минут ішінде көрсету, IT саласын дамыту, халық үніне құлақ асатын және тиімді мемлекет құру, қолайлы өмір сүруге арналған цифрлық құралдарды қолдану, технологиялық және инновациялық бизнесті дамыту, сапалы интернет пен ақпараттық қауіпсіздікті қамтамасыз ету бағыттарынан тұрады. Сондай-ақ, ұлттық жобаны іске асыру үшін 2,2 трлн теңге қаражат жұмсалатынын атап өттік. Соның 1,4 трлн теңгесі мемлекеттік бюджеттен, ал 800 млрд. теңгесі жеке инвестициялар ретінде тартылады деп жоспарланған.