Жасанды интеллект көмегімен технологияларды дамыту экономикалық өсімге жаңа серпін береді. Бұл туралы Цифрлық даму, инновациялар және аэроғарыш өнеркәсібі вице-министрі Асқар Жамбакин Technowomen Central Asia халықаралық форумында айтты.
«Сарапшылардың бағалауынша, 2030 жылға қарай жасанды интеллектінің әлемдік экономикаға қосқан үлесі 15,7 трлн долларға дейін жетеді, бұл қосылған құнның қазіргі әлемдік ЖІӨ-мен салыстырғанда 14%-ға өсетінін білдіреді. Мұндай ауқымды сандар ЖИ технологиясы біздің болашағымыздың ажырамас бөлігі екенін растай түседі. Ол жұмыс пен өзара іс-қимыл арқылы төңкеріс жасап қана қоймай, экономикалық өсуге жаңа серпін береді», — деді Асқар Жамбакин форумның ашылуында.
Вице-министр денсаулық сақтау саласында жасанды интеллектіні сәтті қолданудың мысалы ретінде стоматологиядағы IDent стартапын атап өтті.
Сондай-ақ, оның айтуынша, ЖИ қолдану арқылы цифрландыру мемлекеттік аппаратты бюрократиядан арылтуға да көмектеседі, бизнес-процестерді ұйымдастыруды қамтамасыз етіп, инклюзивтілікті арттырады.
«Өткен жылы біздің жобаларымыздың бірі — „Отбасы“ цифрлық картасы цифрлық инклюзия бойынша әлемдегі ең үздік жоба атанды. Бұл халықтың әлеуметтік осал топтарына, зейнеткерлерге және басқа топтарға 40-тан астам қызмет көрсетуге мүмкіндік береді. Оған қоса, елімізде ЖИ саласын дамыту үшін жағдай жасап жатрымыз. Бізде ұлттық ЖИ платформасын әзірлеу секілді қажетті технологиялық инфрақұрылым қалыптасуда, 90-нан астам дерекқор, бизнес, мемлекеттік органдар мен ғалымдар үшін қолжетімді болатын үлкен көлемдегі ақпаратты өңдей алатын қуатты суперкомпьютер интеграцияланған», — деп толықтырды Асқар Жамбакин.
Сонымен бірге, БҰҰ жанындағы Халықаралық телекоммуникация одағының Бас хатшысы Дорин Богдан-Мартин бүгінде ЖИ саласында жұмыс істейтін мамандардың 21% әйелдер екенін атап өтті.
«25 сәуір — ақпараттық-коммуникациялық технологиялар саласындағы әйелдер күні. Бүгінде ЖИ саласындағы қызметкерлердің 21% — әйелдер. Әйелдер ұзақ уақыт бойы мемлекеттік органдардың жоғары лауазымдарының көп бөлігін иеленбеді. Біз бұл көрсеткіштердің қандай аз екенін көріп отырмыз. Қазір оны өзгертетін уақыт келді. Өйткені техникалық орталыққа инновациялық идеялар, креатив пен бүкіл адамзатты жақсартуға бағытталған әйелдердің шешімдері қажет. Сондай-ақ, жас қыздарды әртүрлі ілімдер мен тәлімгерлік курстарымен ынталандыру және оларды шабыттандыру маңызды, өйткені олар біздің болашағымыздың көшбасшылары», — деді БҰҰ өкілі бейнетрансляцияда.
