Мемлекет басшысы Қасым-Жомарт Тоқаев Астанада өтіп жатқан “Алтын сапа” және “Парыз” сыйлығының лауреаттарын марапаттау рәсіміне қатысты.
Мемлекет басшысы қазір Қазақстанда кәсіпкерлік саласы қарқынды дамып келе жатқанын атап өтті. Ол үшін мемлекет барлық жағдайды жасап отыр. Шағын және орта бизнестің үлесі жалпы ішкі өнімнің 36 пайызынан асты. Салтанатты жиынға қатысушылар алдында сөйлеген сөзінде Мемлекет басшысы бірнеше жайтқа назар аударды.
“Цифрлық платформаны созбалаңға сала бермей, тез арада құру аса маңызды. Сол арқылы инвестициялық жобалардың жүзеге асырылу процесін нақты уақыт режимінде бақылауға болады. Мемлекеттік органдардың инвесторларға қатысты барлық шешімі мен шектеу шаралары бойынша “прокурорлық сүзгі” жұмыс істей бастайды. Осылайша, біз инвесторларды негізсіз айыппұлдар мен салықтардан, әділетсіз және ұзаққа созылған сот дауларынан қорғаймыз. Жалпы, бизнес үшін әділ әрі ашық ойын ережесін қамтамасыз етуге бар күш-жігерімізді жұмсаймыз.
Елімізде жасанды интеллект жүйесін құру – өз алдына бөлек әрі өте маңызды мәселе. Қазақстанның болашағы және оның халықаралық қоғамдастықтағы орны осы жұмыстың сәтті іске асуына байланысты. Сондықтан бұл бағытқа өзім жетекшілік етемін және шетелдік, отандық мамандармен кездесемін, сондай-ақ жүктелген міндеттердің орындалуын бақылауда ұстаймын”, – деді Президент.
– Менің цифрландыру ісіне және инновацияны енгізу мәселесіне баса мән беретінімді баршаңыз білесіздер. Біздің маңызды стратегиялық міндетіміз – Қазақстанды ІТ мемлекетке айналдыру. Цифрландыру ісінде нақты жетістіктеріміз де жоқ емес. Біз электронды үкіметті және финтехті дамыту индексі бойынша әлем көшбасшыларының қатарында тұрмыз, – деді Президент Қасым-Жомарт Тоқаев.
Бұған ІТ саласындағы әлеуетіміз мүмкіндік беретініне тоқталған Президент 2026 жылға қарай ІТ қызметтерінің экспортын бір миллиард долларға жеткізу туралы Үкіметке тапсырма берді.
– Былтырдың өзінде ІТ саласындағы экспортымыз бес есе өсті. Жыл соңына дейін бұл көрсеткіш 500 миллион долларға жетуі мүмкін. Әрине, мұнымен шектелмейміз. 2026 жылға қарай ІТ қызметтерінің экспортын бір миллиард долларға жеткізу – Үкіметке жүктелетін жаңа міндет. Шетелдің ірі ІТ компанияларымен бірлескен кәсіпорындар ашу бұл іске септігін тигізері сөзсіз. Үкімет осы мәселені мұқият зерделеп, нақты ұсыныстар енгізуі керек, – деді Президент.