Қазіргі кезде Қазақстанда әлеуметтік желілермен жұмыс істейтін SMM мамандығына сұраныс аз емес.
SMM менеджер ағылшын тіліндегі Social Media Marketing деген сөздің бас әріптерінен құралған атау. SMM менеджері әлеуметтік желілерде отырып, өзі қызмет ететін компания немесе мекеменің жұмыс бағдарына сай мақсатты аудиторияны тартатын, үйлестіретін маман. Олардың басты мақсаты оқырмандарды мекеме сайтына бағыттап, клиентке айналдырып, компания өнімдеріне көптеп адам тарту, жарнамалау.
Еңбек нарығында осыдан 7 жыл бұрын пайда болған кәсіп бүгінде трендке айналған. Бір қызығы, бұл мамандықты ешбір жоғары оқу орны оқытпайды. Жас талғамайтын мамандықты жастар да, ересектер де игере алады. Ол үшін бір айлық курсын оқып алса болғаны.
Елімізде ментор берген сертификатымен айына кемінде 80-200 мың теңге аралығында табыс табуға мүмкіндік бар. Жалпы, әлеуметтік желінің қыр-сырын үйреніп, контент жоспар жасап, қоғамға сату тәсілдерін қолдана білген кез келген жан SMM менеджер бола алады. Сонымен қатар, сала бойынша мақсатты аудиториямен жұмыс істей білуі және адамдармен дұрыс қарым-қатынас ұстай білуі де маңызды.
Бүгінде интернет-маркетолог онлайн бизнесті алға жылжытып отырғаны белгілі. Ғаламтордың бір сегментіне айналған SММ маманы ВКонтакте, Instagram, Telegram, Youtube, Facebook-те белсенді болып, қызықты әрі пайдалы жазбаларымен халықты өзіне тартып отыр. Үйден шықпай-ақ компьютер алдында SMM арқылы табыс тауып отырғандардың дені студенттер, бала күтіміне байланысты үйде отырған аналар және өзінің шағын және орта бизнесі бар кәсіпкерлер. Жалпы, әр салада цифрлы технологияларды меңгеріп, оның әдіс-тәсілдерін дұрыс қолдана білгендерге қай жерде де сұраныс жоғары.
Өйткені, ІТ мамандығынсыз болашақты елестету мүмкін емес. Әлем бойынша ең қажетті мамандықтар тізімінде ІТ маманы екінші орында. Технологиялық прогрестерге байланысты халық та кейбір қызмет пен тауар түрлерін қолындағы ұялы телефонмен-ақ тапсырыс беріп-ақ ала алатын жағдайға жеткен. Егін және мал шаруашылығы маманы, медицина маманы немесе қаржыгер, ауыр индустрия маманы, жасанды интеллект, роботизация, автоматизация сынды мамандықтардың өздері елімізде цифрлы технологияның қаншалықты дамығандығын көрсете алады.
