Түркістан облысында «Аңсаған сәби» бағдарламасы аясында 100-ден астам нәресте өмірге келді. Бұл туралы ҚР Денсаулық сақтау министрі Ажар Ғиният Түркістанға келген сапарында айтты.
Денсаулық сақтаудың басым бағыттарының бірі ана мен баланы қорғау болып қала беретінін атап өткен министр еліміздегі перинаталдық қызмет деңгейін көтеру міндеті қойылып отырғандығын жеткізді.
«Мемлекет басшысының тапсырмасын іске асыру аясында халықаралық стандарттарға сәйкес келетін 8 перзентхана, оның ішінде Түркістан облысында – 2 перзентхана салу жоспарлануда», – деді А.Ғиният. Сондай-ақ, еліміздің бас дәрігері «Аңсаған сәби» бағдарламасы аясында Түркістан облысында 100-ден астам нәресте өмірге келгендігін айтып өтті. «2021 жылдан бастап Қазақстан Республикасы Президентінің тапсырмасы бойынша «Аңсаған сәби« арнайы бағдарламасы іске қосылды. Онда 2026 жылға дейін ЭКҰ-ға жыл сайын 7000 квота бөлу қарастырылған. 2021 жылы Түркістан облысында 453 квота бөлінді. 62 әйел жүкті болып, 106 – сы бала туудың бақытына ие болды» – деді министр.
Сондай-ақ, А.Ғиният денсаулық сақтау жүйесін кадрлармен қамтамасыз ету туралы айтты. Мәселен, 2021 жылы еліміздің өңірлеріне медициналық жоғары оқу орындарының 3050 түлегі бөлінді. Оның ішінде Түркістан облысына – 180 түлек жіберілген. Ал, биыл 170 түлек жіберу жоспарлануда. 2025 жылға қарай республикалық бюджет есебінен гранттар саны 2000-ға дейін және жергілікті бюджет қаражаты есебінен 1500-ден астам грант ұлғайтылатын болады.
Денсаулық сақтау министрі Ажар Ғиният Түркістан облысына жұмыс сапары аясында өңір басшысы Өмірзақ Шөкеевпен кездесті. Ведомство жұмысының басым бағыттары туралы хабардар ете отырып, А.Гиният жаңа медициналық бекеттер мен дәрігерлік амбулаториялар салуды, ФАП-тарды кеңейтуді көздейтін ауылдық денсаулық сақтауды жаңғырту жөніндегі ауқымды жоба жайлы жеткізді. Бұл әсіресе шалғай елді мекендері дамытуға бағытталмақ. Жоба аясында аудандық және ауданаралық ауруханалардың мәртебесі артып, олардың базасында инсульт орталықтары, шағын инвазивті хирургия бөлімшелері ашылады. Сондай-ақ, бұл жоба ауыл тұрғындары үшін кәсіби тексерулерді кеңейтуді, медицина кадрларын даярлауды көздейді. Ауыл тұрғындары үшін мамандандырылған медициналық көмектің қолжетімділігін арттыру мақсатында аудандық және ауданаралық ауруханалардың мәртебесі арттырылатын болады, деді министр.
Аудандық ауруханалар базасында инсульт орталықтары, шағын инвазивті хирургия, травматология, медициналық оңалту бөлімшелері ашылады.Министр дәрігерлердің кәсіби жауапкершілігін сақтандыру жөніндегі заң жобасына тоқталып өтті. Қазір ол Парламентте қаралуда.
«Аталған заң жобасы адам денсаулығына келтірілген зиянды өтеу тетігі арқылы емделушінің мүддесін қорғауға бағытталған, сондай – ақ бұл нормалар халыққа көрсетілетін медициналық қызметтердің сапасын жақсартуға ықпал етеді, дәрігерлердің мәртебесін арттыруға мүмкіндік береді», – деді А.Гиният.
Облыс басшысы Өмірзақ Шөкеев аталған бастамалар бойынша қолдау білдіріп, жаңа денсаулық сақтау нысандарының құрылысын іске асыру, медициналық ұйымдардың кадрлық қамтамасыз етілуін қолдау, пайдалануға берілетін нысандарды заманауи жабдықтармен жарақтандыру жоспарларын атап өтті.
Айта кетейік, Түркістан облысына жұмыс сапары барысында министр жаңадан бой көтерген жедел медициналық жәрдем станциясымен танысып, «Қамқорлық» балаларды оңалту орталығында болды. Түркістан қалалық емханасының үздік тәжірибелер орталығының жұмысын көріп, өңірдің медицина қызметкерлерімен кездесті. Түркістандықтармен есеп беру кездесуін өткізді.
