Еліміздегі болып жатқан сан мыңдаған оқиғалар тізбегін толық ақтарғалы отырған жоқпыз. Бар болғаны жаңғырған жаңа өңір хақында толғансақ дейміз. Олай болатыны биыл Түркістан облысының уығын қадап, шаңырағын көтергеніне төрт жылдан асты. Құт пен бірліктің бастау көзі болған атаулы облыс төрт жылдығын жай бастағалы отырған жоқ. Кәдімгі өзіне ізбасар ретінде Ұлытау, Жетісу, Абай облыстарын ала келді. Өзінің жүрген жолымен, басқан ізімен, бағындырған белестерімен, түрленген келбетімен үлгі болмаққа ұмтылып-ақ тұр.
Өз ғұмырының көрікті де көңілді төрт көктемін, жазиралы төрт жазын, қоңыр салқын төрт күзін, қаһарлы төрт қысын мәнді де мағыналы өткізіп, күрделі кешулер керуенін талықпай сүйреп, жеңіс тұғырына, биіктікке ұмтылу оңайға түспесе керек. Оның да кермек дәмі, қиындықтары мен кедергілері жетерлік. Мәселесеі шексіз екені тіптен анық. Бұл төрт жыл облыс мәртебесін алып түрленуі деп ұғынған ләзім. Өйткені жәдігер шаһардың тарихы тамырлы, есім-сойы мыңжылдықтар қатпарына жасырынғаны һәм жаны мен тәні қазақ үшін қызмет еткені баршаға мәлім.
Шындап келгенде, Замана соққан жел дейтін аталы сөздің мағынасы арыда жатқандай. Тіпті әр адам баласын тұманды да ауыр-ауыр ой әлеміне жетелеп тұрғандай. Түркістан бір кездері басына бақ қонып, сән-салтанаты тасып күллі түрік жұртына борықты қоныс болған қасиетті орда. «Ертеде Түркістанды Тұран дескен» (Мағжан) сол бір дәуірлер көкжиегінде атына қызыға да, қызғана да қараған көшпелілердің арманы болған бақ мекен. Енді бір кездері отарлықтың отына күйіп, өлместің күнін кешкен шерлі жұрт.
Киелі шаһар жайлы сөз бастау оңай дүние болмасы анық. Ол тарихы тамырлы, рухы асқақ киелі өлке. Қасиеттің ордасы болған қастерлі аймақ. Күллі Орталық Азия мен Тұран даласындағы ең көне қала дейтін атағы тағы бар. Заманында екі жүз жылға жуық уақыт Қазақ хандығының астанасы болғаны тарихтан белгілі. Енді бір сөзбен айтқанда, ұлт тағдырының ұлы шешімдері осында жасалып, ел келешегі сан мәрте талқыланған құтты топырақ.
Барша түркі халықтарының ата қонысы саналатын шаһарда рухани ілімнің бабасы болған Қожа Ахмет Ясауи жатыр. Сонау бабалар тарихынан сыр шертіп, мұқалмас жігер сыйлайтын құдірет бар онда. Содан да жеті ғасыр ілгері Ақсақ темір бас болып салдырған күмбезі көк тіреген кесене бізді өрлікке жетелейтіндей. Қазақтың даңқты хандары, батырлары, билерінен 130 – дан астамы жатыр. Олардың 21-і хандар. Қазақ жұртына түкіргені түйме алтын, қақырғаны қайма алтын болған тұлғалар. Ел іргесін жаудан қорғап, халқының амандығы үшін маңдай терін сарп еткендер. Осылай айта берсек сөз жалғаса бермек. Түркістанның маңызы мен шежіресі де ақтарыла бермек.
Өр рухпен айтылған ізгі арман, игі тілектің күндердің бір күнінде іске асып, шындыққа айналуы ғажап емес дегендей ақыры сол сөз шындыққа айналды. Сол таң нұрымен бірге шаһар жұрты, тіпті тұтас ел тағы оянды. Бөркін аспанға атып алпыс екі тамыры бусанып, шер мен налаға толы көкірегі қуаныштан бүр жарып, ақ түйенің қарыны жарылған, дүлдүл тұяқтың дүбіріне от беріп, көбеңсіп жеткен таңғажайып қуаныш көңіл көгімізде жарқырады. Шығандап барып тағы бір нұр шашып атар таңдай, манаурап батар кештей болашаққа қанат жайдық. Сөйтіп, түрленуге жаңа қадам басқан Түркістан аты түркі жұртына, әлемге су жорғадай тайпала жөнелді.
2018 жылдың 19 маусымы шаһар үшін тарихи күн. Жаңа ғасырдағы даму мен гүлденуге жол ашылған шақ. Дәл осы күні тұңғыш Президент Назарбаев «Қазақстан Республикасының әкімшілік-аумақтық құрылымы туралы» заңының 3-бабы 1-бөліміне сай Түркістан облысының орталығы Түркістан қаласы болатыны, ал халқының саны миллионға жеткен Шымкент қаласына республикалық маңызы бар қала мәртебесі берілгені туралы Жарлығын жариялады.
Осылайша, байырғы Тұран даласында, бүгінгі қазақ елінде жаңа облыс орталығы ашылып, оның орталығы Түркістан қаласы болып бекітілді. Бұрынғы Оңтүстік Қазақстан облысының орталығы болған Шымкент қаласы еліміздегі Астана, Алматы қалаларынан кейінгі үшінші ірі мегаполистік орталық болып өңір халқына қуаныш сыйлады. Ендігі қадам жаңа облыс орталығын түлету болғаны айқын. Жарлық шықты да, іске кірісу де уақытында жүріп кетті.
Ал, жаңа облыс орталығының тарихын 2018 жылдың 17 тамызында Шымкенттегі облыс әкімдігі құрамының Түркістанға көшіп келуінен бастаған жөн. Сол кездегі жаңа облыс әкімі болып тағайындалған Жансейіт Түймебаевтың бастауында жаңа орталық – Түркістанға қоныс тепті. Ендігі мақсат та, көз алдағы міндет те айқын болатын. Атап айтқанда шаһарды дамыту мен өркендету болып табылады.
Шынында төрт жылда көркі көз сүріндіретіндей болып құлпырып сала берді. Бұрын ат басын бірнеше рет бұрғандарды қойып, өмір бойы осында тіршілік етіп келе жатқан қала тұрғындарының өзі танымастай өзгерді. Апта сайын жаңарып, ай сайын танымайтындай дамып жатыр.
Қарап отырсақ, тарихи шешім жасалғалы Түркістан тек алға басып келеді. Айтарға аз уақыттай сезілгенімен атқарылған жұмыстар легі жетіп артылады. Небір таңғаларлық бағыттарда нақты әрі нәтижелі жұмыстар жасалынып жатыр. Осының барлығын ел тізгінін ұстаған президенттер мен өңір басшыларының еңбегінен, олардың көрегендігінен деп айтуға болады. Олай болатыны Түркістан облыс болған жылдарда екі президент, екі облыс әкімі, үш қала әкімі қызмет атқарыпты. Тарқатып айтар болсақ, жаңа облыс болғанда Жансейіт Түймебаев облыс әкімі болып тағайындалса, 2019 жылы 26 ақпанда Өмірзақ Шөкеев өңір тізгінін қолына алды. Бұдан соң 2022 жылы 31 тамызда Дархан Сатыбалды облыс әкімі болып тағайындалды. Облыс орталығы болған киелі шаһардың бірінші әкімі ретінде Әліпбек Өсербаев (қала үшін ілгері жылдарда қызмет атқарып, өз бойындағы білімін шаһар бет-бейнесін қалыптастыру жолына арнаған өңірге таныс азамат), екіншісі Рашид Аюпов болса, бүгінде үшінші әкім ретінде Нұрбол Тұрашбековтың қызмет етіп, қаланы өрге сүйреп жатқанына бір жыл толды.
Мемлекет басшысы Қасым-Жомарт Тоқаев «ЖАҢА ҚАЗАҚСТАН: ЖАҢАРУ МЕН ЖАҢҒЫРУ ЖОЛЫ» атты Қазақстан халқына Жолдауында берілген тапсырмалар кезең-кезеңімен орындала бастады. Маусымның 5-індегі референдумға бүкіл республика жұртшылығы зор белсенділікпен қатысса, жалпы Түркістан облысы өңірлерден оза шауып көш бастады. Осыдан төрт жыл бұрын құрылған Түркістан облысы мен құрылғанына бір жыл болған Сауран ауданы тұрғындарының да азаматтық позициялары нығайып, үлкен істерді атқаруға ынта-жігері өсе түсуде.
Президент Қазақстан халқына Жолдауында: «Мемлекетіміздің өркендеуі аймақтардың қуатты болуына тікелей байланысты. Мен бұл мәселеге 2019 жылғы Жолдауымда кеңірек тоқталдым. «Қуатты өңірлер – қуатты ел» деген ұстаным әрдайым өзекті. Осы орайда, еліміздегі әкімшілік-аумақтық құрылымның оңтайлы болуы өте маңызды. Бұған дейін Шымкент республикалық маңызы бар қалаға айналды. Облыс орталығы Түркістан қаласына көшірілді. Сонымен бірге Оңтүстік Қазақстан облысы Түркістан облысы деп аталды. Бұл қай жағынан алсақ та, дұрыс қадам болды. Оны халық өте жылы қабылдады. Мен «Тәуелсіздік бәрінен қымбат» атты мақаламда осы үрдіс жалғасатынын айтқан едім»,- деп ерекше тоқталды.
Жоспары мен келешегі талқыланған әрі бекітілген шаһарды дамытудың жұмыстары төрт жылдан бері қарқынды жүріп келеді. Ауқымды құрылыс жұмыстары басталып қазірге дейін салынып жатыр. Кезегінде бой көтеріп пайдалануға берілгендерін ретімен айтамыз. Қалам ұшын облыс орталығында болған елеулі оқиғаларға бағыттап көрейік.
Облыс орталығына айналған шаһарды әлеуметтік-экономикалық дамуымен қатар, Түркістан қаласының идеологиялық негіздемесін қалыптастыру бойынша 4 бағыт айқындалған болатын. Олар: біріншіден, Түркістан – қазақ халқы мен түркі тілдес елдердің ең ірі зиярат және туризм орталығы. Екінші, Түркістан – әлемдік деңгейдегі қолөнер және шеберлер орталығы. Үшінші, Түркістан – Ұлы Жібек жолының бойында орналасқан ірі сауда орталығы. Төртінші, Қожа Ахмет Ясауи – рухани тұлға бағыттарына арналды. Бұл бойынша да жұмыстар жүйелі орындалып келеді.
Түркістан облысының өзі салған облыс әкімдігі ғимараты, Астана қаласының сыйға тартқан алаңы, Алматы қаласы салғызған медиаорталық, Солтүстік Қазақстан облысы тарту еткен олимпиада резерві спорт мектебі, Батыс Қазақстан облысы салған музыкалық мектеп, Павлодар салып берген Халыққа қызмет көрсету орталығы, Қызылорда облысының шығыс моншасы, Жамбыл облысының қабылдау орталығы, Шығыс Қазақстанның музыкалық субұрқағы, Маңғыстаудың амфитеатры, Қостанайдың неке сарайы, жеке инвесторлар салған «Түркістан» автобекеттерін атауға болады.
Олардың ішінде «Әкімшілік-іскерлік орталықта» 8 нысан бар. Оларды атасақ: 7000 орындық стадион, Оқушылар сарайы, Департаменттер үйі, Басқармалар үйі, Конгресс холл, Цифрлық кеңсе, Аттракциондар саябағы. Келесі «Рухани-мәдени орталықта» 7 нысан бар. Бұл қатарда Ясауи мұражайы, «Ұлы Дала» орталығы, Қолөнер шеберлері орталығын қайта жаңғырту, Ғылыми-әмбебап кітапханасы, Драма театры, Тұңғыш Президент саябағы, Арбат болып саналады.
Әрқайсысы 120 бөлмеден тұратын жеке инвестициялар есебінен туристерге лайықты сервистік қызмет көрсететін «Rixos», «Нұр-Әлем», «Hampton by hilton» атты қонақ үй кешендері қала келешегінің көрінісі секілді. Оны көрген адам таңдай қақпай тұра алмасы тағы бар. Тағы бір ерекше құрылыс ретінде «Рухани-мәдени орталық» бағытына жататын «Керуен Сарайының» құрылысын айтпай кету мүмкін емес. Бұдан өзге, Қ.А.Ясауи кесенесінің буферлік аумағында абаттандыру жұмыстары соңына да шықты. Сондай-ақ, аумағы 20 гектарды құрайтын Б.Саттарханов даңғылы бойындағы желілік саябақтың құрылысы аяқталған. Енді тілге тиек ететін бірегей құрылыстың бірі қаладан 16 шақырым қашықтықтағы Шаға елді-мекенінен бой көтерген Халықаралық әуежай.
Маусымның 15-інде ҚР Президенті жанындағы ОКҚ-да өткен брифингте өңірдің даму қарқыны туралы айтылды.
Түркістан облысының құрылғанына 4 жыл уақыт өтті. Облыстың әлеуметтік-экономикалық дамуының оң үрдісі қалыптасты. Жалпы ішкі өнім 1,6 есеге артып, 2 трлн. 800 млрд. теңгеге жетті. Ауыл шаруашылығы 9,6 млрд. теңге болды. Қазір Түркістан облысында жыл сайын 824 мың шаршы метр тұрғын үй пайдалануға беріледі.
Түркістан облысының индустриялық аймақтарында жалпы құны 32 млрд. теңге болатын 44 жоба іске қосылды. Оның нәтижесінде 2368 жұмыс орны ашылды. Өңірде 1150-ге жуық бизнес субъектісі жұмыс істейді. «Қарапайым заттар экономикасы» бағдарламасы бойынша 43 млрд теңгеге 315 жоба мақұлданды. «БЖК-2025» бойынша 2,5 млрд. теңгеге қолдау көрсету жоспарланып отыр. Шағын және орта бизнесті қолдау шаралары арқасында өндірілген өнім көлемі 47 пайызға өсіп, 1 трлн. теңгеден асты.
Түркістан облысында құрылыс саласы едәуір дамып, нәтижесінде құрылыс жұмыстарының көлемі 2021 жылы 2,3 есеге артып, 322,9 млрд. теңгеге жетіп отыр. 2018 жылы бұл көрсеткіш 139,1 млрд. теңге болатын.
Жаңа облыс құрылған 4 жыл ішінде өңірде құрылыс қарқыны арта түсті. Былтыр 823,8 мың шаршы метр тұрғын үй пайдалануға берілді.
Ал 2022 жылдың басынан бері пайдалануға берілген тұрғын үйдің жалпы алаңы 191,5 мың шаршы метрді құрап, өткен жылдың сәйкес кезеңіне қарағанда 17,7%-ға артты.
Биыл құрылыс жұмыстары 329,3 млрд. теңге мөлшерінде болады деп жоспарланған. Облыста тұрғын үйді пайдалануға тапсыру жоспары 855 мың шаршы метр болып белгіленді.
Облыста газ саласы бойынша 252 нысан пайдаланушы ұйымның теңгеріміне өткізілді. Газбен қамтамасыз етілген елді-мекендердің жалпы саны 457-ге жетті (1 млн. 374 мың адам немесе 67,2%).
Биыл 50 нысанның құрылысы жүргізілуде, 33400 тұрғыны бар 15 елді-мекен мен 4 мөлтек аудан газға қосылмақ.
Осы жұмыстар нәтижесінде 472 елді-мекен немесе 1 млн. 407 мың адам «көгілдір отынды» пайдалануға мүмкіндік алады. 14 автоматтандырылған газ тарату станциясы салынды.
2021 жылы 32 мың тұрғыны бар 40 елді-мекен сапалы электр қуатымен қамтылса, 2022 жылы қосымша 39 мыңға жуық тұрғыны бар 10 елді-мекен сапалы электр қуатымен қамтылады.
Бұл туралы Орталық коммуникациялар қызметінде баяндалды. Қазіргі таңда Түркістан қаласын дамытудың ІІ кезеңі жалғасуда.
Түркістан қаласы туризм, мәдениет, медицина, білім мен ғылым, спорттың орталығына айналып келеді. Мұнда тұрғындардың, жастардың жан-жақты дамуына қолайлы жағдай жасалып жатыр.
Облыста инвестиция көлемі де ұлғайған. Негізгі капиталға бағытталған инвестициялар көлемі 2021 жылдың қорытындысымен 2,3 есеге артып, (2018 ж. – 288,1 млрд. теңге) 660,3 млрд. теңгені құрады. Өңірлік кәсіпкерлікті қолдау картасы аясында Түркістан облысы бойынша 2020-2025 жылдары 323,3 млрд. теңгеге, 4823 жаңа жұмыс орнымен 34 инвестициялық жоба енгізілген. 2020-2021 жылдары инвестициялық құны 13,6 млрд. теңге болатын 19 жоба жүзеге асырылып, нәтижесінде 2015 жаңа жұмыс орны құрылды.
Түркістан қаласын дамытудың ІІ кезеңі шаһардағы 4 аумақта жүзеге асырылуда. Бірінші аумақ – әуежай аумағы. Мұнда 12 жоба қолға алынады. Оның ішінде 100 орындық қонақ үй, жеміс бағы, 50 га жерге жылыжай, 10 мың бас ірі қара бордақылау кешені, 1200 бас тауарлы-сүт өндіру фермасы салынады.
Екінші аумақ – әкімшілік-іскерлік орталығында 57 жобаны жүзеге асыру жоспарланған. Халықаралық теннис орталығы салынды. «Мұз сарайының» құрылысы жүруде. Ат спорты кешені, демалыс орындары және денсаулық сақтау нысандары, инженерлік инфрақұрылымы да салынбақ. Сондай-ақ осы аумақта жалпы 4,8 млн. шаршы метр тұрғын үй салып, 46 мың пәтерді пайдалануға беру жоспарланған.
Үшінші аумақ – Б.Саттарханов даңғылының бойында да бірқатар жобалар жүзеге асады.
Ал төртінші аумақ – Мәдени-рухани орталықта Күлтөбе қалашығының тарихи нысандарын қалпына келтіру, «Әзірет Сұлтан» музей-қорығының аумағын абаттандыру жоспарға алынған.
Бұдан бөлек, «Керуен сарай» тұрғын үй кешені, «Аманат» коттеджі қалашығы, «Medina Palace» қонақ үйі, «Қылует» мәдени-рухани орталығы салынуда.
Жалпы Түркістан қаласын дамытудың 2-кезеңінде инвестициялардың көлемі 1,3 трлн. теңге болады деп межеленген. Оның 1 трлн. теңгесі немесе 77%-ы – жеке инвестициялар.
Қаланы суландыру, газдандыру мәселесі шешімін тапқан. Жасыл алқап аумағы ұлғайып, қаланың экологиясы да жақсарып келеді. Туристер саны артып, республикалық, халықаралық деңгейдегі басқосулар жиі өтуде.
Бұл туралы Орталық коммуникациялар қызметінде сөз болды.
Түркістан облысында 150 мыңға жуық шағын және орта бизнес субъектілері жұмыс істейді. Өңірде кәсіпкерлікті қолдау бағытында жүйелі жұмыстар атқарылып жатыр. Аудан мен қала тұрғындарымен кездесулерде облыс басшылығы тарапынан осы бағытта түсіндірме және насихат жұмыстары атқарылуда.
Елдің кәсіпкерлікке деген ықыласы жақсы. Өңірде «Қарапайым заттар экономикасы» арқылы 42,9 млрд. теңгеге 315 жоба мақұлданды. Бұл көрсеткіш бойынша Түркістан облысы республикада бірінші орында тұр. «Бизнестің жол картасы 2025» бағдарламасы арқылы 2,2 млрд. теңгеге қолдау көрсету жоспарланып отыр. Шағын және орта бизнесті қолдау шараларының арқасында өндірілген өнім көлемі 47%-ға өсіп, 1,2 трлн. теңгені құрады.
Қазіргі таңда өңірде Түркістан облысы әкімдігінің тиісті басқармалары арқылы кәсіпкерлікті дамыту, мемлекеттік жеңілдіктер алу жолын түсіндіру бойынша ауылдарда, қалаларда семинар-кеңестер жалғасып жатыр.
Түркістан өңірінде қоңыржай ауа-райын қалыптастырудың кешенді бағдарламасы жүзеге асырыла бастады. Сонау Көкшетаудағы Сәкеннің сексен көлі атанған аумақ секілді Түркістан маңын барынша көкжелектендіру ғана емес, қолдан көлшіктер орнату, қалаға жақын маңнан су қоймаларын салу жұмыстары қарқын алуда. Оның ішіндегі бірі де бірегейі қаладан небәрі елу шақырым жерде орналасқан бұрын Шошқакөл атанып келген су жүйелерін «Жетікөл су жүйесі» айдарымен кешенді бағдарламаға айналдырды. Өйткені, бұл «Жетікөл су жүйесі» аумағында үш ауданның территориясын қамтыған жетпістен астам көлдер мен көлшіктер құрайды. Мұнда құстардың 420-дан астам түрлері мекендейді. Осы бағытта туристер мен қала қонақтарының жылдам жетуіне арналған дамба құрылысы жүргізілуде. Жақында аяқталатын түрі бар.
Бұдан басқа ондаған жобалар қарқынды жүргізілуде. 2021 жылы 8 елді-мекенде су құбыры қайта жаңартылып, 20 елді-мекенге жаңа ауыз су құбыры тартылған. Нәтижесінде 717 елді-мекен немесе 1 млн. 932 мың адам (94,5%) ауыз сумен қамтылған.
Биыл 14 елді-мекеннің су құбыры қайта жаңартылып, 13 елді-мекенге жаңа ауыз су құбырын тарту жоспарланған. Сол арқылы 730 елді-мекенді немесе сумен қосымша қамту көзделуде.
Түркістан қаласында «Жасыл белдеу» қалыптастыруға, қаланы көгалдандыру мен абаттандыруға баса мән беріліп келеді. Қазіргі таңда саябақ мен гүлзарлар саны 60-қа жетті. Көгал аумағы 2,5 млн. шаршы метрден асады.
Жасыл желекті суғару бойынша жерасты суы мен Арыс-Түркістан каналының суын барынша тиімді пайдалану қолға алынды. Облыс әкімі қаланы абаттандыру, арықтар мен каналдардың жұмысын жүйелеу жөнінде тапсырма берді.
Бүгінде шаһардағы 200-ден астам көше ирригациялық арық арқылы суғарылуда. Оған гидрантты жүйелер пайдаланылады. Жоспар бойынша биыл облыс орталығында 250 мың ағаш көшеті мен 128 гектар көгал егіледі. Жыл басынан бері 500 мың шаршы метр аумаққа көгалдандыру жұмысы жүргізіліп, 100 мыңнан аса көшет отырғызылды. Қаланың «Ботаникалық бақ» аумағы жағынан су тазартылатын №1, №2 су қоймасын салу жұмыстары жүргізілуде. Оған Р-33 каналынан су алынады.
Түркістан қаласын одан әрі жақсарту мақсатында 2021-2022 жылдар аралығында 269,2 шақырымды қамтитын 216 көшеге жарықтандыру жүргізу жоспарланды. Қазіргі таңда 124 көшеде жарықтандыру толығымен іске қосылып, қалған 92 көшені электрмен жабдықтау жұмыстары жалғасуда.
Бағыт-бағдары айқын Түркістан облысының дамуы мен түлеуі көз ілестірмей жатқаны ақиқат. Бір жаңалығын жеткізіп болғанша, енді бір жаңалығы жарқ етіп жатқаны жасанды емес. Түркістанмен бірге Кентау қаласының да бағы жанып, бабы келіп жатқанын айта кеткен оң болмақ.
Ел Президенті Қасым-Жомарт Тоқаев биылғы Жолдауында «Жаңа Қазақстанды» құру бағытындағы негізгі міндеттерді айқындап берді. Есеп беру форматы өзгеріп, басшылар тұрғындармен еркін пікір алмасып, өзекті мәселелерді талқылап жатыр.Облысымызда көптеген сала бойынша өсу, өрлеу бар екенін айта кеткен жөн.
Өткен жылы экономиканың даму қарқыны +4%-ды құрады. Өнеркәсіп өнімінің көлемі 3,6%-ға артып, 707,8 млрд. теңгені құрады. 186,6 млрд. теңгені құрайтын 34 инвестициялық жоба іске қосылды.
Жалпы, облыс орталығының Түркістан қаласына ауысуы Кентаудың дамуына үлкен серпін берді.
2021 жылы Кентау қаласын дамытуға 1,3 млрд. теңге қаржы бөлінді. Көпқабатты үйлер модернизациялаудан өтті. «Қызыләскер» автоматтандырылған газ станциясын іске қосу жұмыстары аяқталып, қала тұрғындарын табиғи газға қосу мүмкіндігі пайда болды. Шахтаның суын төмендету жұмыстары жүргізілуде. Биыл қаланы дамытуға 1,6 млрд. теңге бағытталып отыр. Кентау қаласы аумағындағы әлеуметтік-инфрақұрылымдық мәселелерді жүйелі түрде кезең-кезеңімен шешіледі.
Инфрақұрылым, қаланы газбен қамту, ономастика, жұмыс орындарын көбейту, жол, баспанамен қамту, балалар ойын алаңшаларын салу жұмыстары өз деңгейінде.
Жаңа облыстың дамуы мен өркендеуі тым биік. Сонымен қатар рухани һәм тарихи тұрғыдан бағындырған белестері жетерлік. Соның ішінде тарихи мәні бар Сауран атауын тірілтіп жаңа аудан құруы үлкен оқиға. Терең мән мен мағына шығып, Бағызы қазақылық аңқып тұрған ауданның аяқтан тұрып, өзге аудандармен бәскелік қабілетке ие болып жатқаны мақтанарлық. Әлеуметтік-экономикалық тұрғыдан да айтарлықтай даму жолында екені ақиқат.
Жаңадан құрылған Сауран ауданы 12 ауылдық округтен тұрады. Атап айтатын болсақ, Шаға, Жаңа Иқан, Ескі Иқан, Үшқайық, Иассы, Оранғай, Қарашық, Жүйнек, Бабайқорған, Шорнақ, Жібек жолы, Майдантал ауылдық округтері. 12 ауылдық округте жалпы саны 35 елді-мекен бар. Ал, аудан орталығы – Шорнақ елді-мекені.
Сауран ауданының жалпы аумағы 721745 шаршы метрді, халық саны 104,235 адамды құрайды. Ағымдағы жылы жергілікті бюджетке 1 млрд. 130 млн. 407 мың теңге қаржы түсіп, жоспар 105,9 пайызға немесе 62 млн. 979 мың теңгеге артығымен орындалды. Оның ішінде трансферттер 693 млн. 313 мың теңге, өзіндік кірістер 437 млн. 094 мың теңгені құрайды. Бюджеттің шығыс бөлігі 1 млрд. 177 млн. 741 мың теңгені құрап, 99,8 пайызға игерілді.
Бір айта кетерлігі кезінде Түркістан қаласына, одан кейін Кентау қаласының қарамағына өткен аудан бүгінде күн сайын түрлену мен түлеуді бастан кешіріп жатыр.
Мемлекет басшысы Қасым-Жомарт Тоқаев «ЖАҢА ҚАЗАҚСТАН: ЖАҢАРУ МЕН ЖАҢҒЫРУ ЖОЛЫ» атты Қазақстан халқына Жолдауында елімізде үш облыстың ашылатынын айтып, халықты бір қуантып тастады.
Міне, осы нәтижелі қадамның жалғасы ретінде елімізде үш облыс қатар ашылды. Мәслихат хатшылары, әкімдері сайланды. Мұны Мемлекет басшысы Жолдауда Ұлытау, Абай, Жетісу деп неге атайтындығын дәйектеп түсіндірді.
«Азаматтарымыздан көптеген ұсыныстар келіп түсті. Менің тапсырмам бойынша оның бәрі мұқият зерделенді. Халықтың қалауын ескеріп, мен бүгін бірқатар бастама көтергелі отырмын…
Бұрынғы Жезқазған облысының аумағында Ұлытау облысын құру қажет. Жезқазған қаласы қайтадан облыс орталығы болады. Бұл аймақта дербес облыс құру – экономикалық қана емес, рухани жағынан да маңызды шешім. Кең байтақ қазақ жерінің дәл жүрегінде орналасқан Ұлытаудың төл тарихымыздағы орны ерекше. Ел тағдыры шешілген ұлы жиындар осында өткен. Сарыарқаның төрінде орналасқан бұл аймақтың туристік әлеуеті өте зор. Оның өндірістік қуатын, логистикалық мүмкіндігін ұтымды пайдалану керек. Бір сөзбен айтқанда, біз Ұлытау аймағының дамуына жол ашамыз»,-дейді Мемлекет басшысы.
Маусымның 7-сінде референдум қорытындысы бойынша Қазақстан халқына жасаған Үндеуінде Мемлекет басшысы: «Қастерлі Тәуелсіздігімізді, ел бірлігін және қоғамдық келісімді нығайту – біздің негізгі міндетіміз. Бұл реформалар құр атақ-абырой үшін қолға алынған жоқ. Мұның бәрін Жаңа, Әділетті Қазақстан құру үшін жасап жатырмыз. Халқымызда «Кеңесіп пішкен тон келте болмайды» деген сөз бар. Бабаларымыз маңызды мәселені алқалы жиында шешкен. Мен осы дәстүрді жаңғыртып, Ұлттық құрылтай құру туралы бастама көтердім. Оған қоғамның түрлі топ өкілдері, беделді әрі белсенді азаматтар шақырылады. Құрылтайдың алғашқы отырысы ұлт ұясы – Ұлытауда өткізіледі. Осылайша, азаматтардың мемлекет ісіне атсалысу мүмкіндігі арта түседі. Шын мәнінде, еліміздің тағдыры – әрқайсымыздың қолымызда.
Ұлытау өңірінің тарихи географиялық тұрғыдан жəне топонимикасының зерттелуі жан- жақты саралау мен талдауды қажет етеді. Себебі бұл өңірдің тарихы қазақ тарихының құрамдас бөлігі болып табылады жəне осы территория туралы тарихи-географиялық мəліметтер, қалыптасқан топонимикалық жүйесі өлке тарихы үшін де, отан тарихы үшін де өте мол тарихи ақпарат береді.
Шын мəнінде де, дала өлкесі кеңістігіндегі Қазақстан тарихынан ерекше орын алатын Ұлытау территориясы, яғни Сарыарқа өңірінің батыс бөлігі. Ұлытау – қазақ сахарасындағы қасиетті мекендердің бірі, отандық тарихшылар тарапынан «көшпелілер өркениетінің алтын бесігі» деген бағаға ие болуы да тегін емес.
Шынында да, Ұлытау өңірінде қазақ тарихының барлық кезеңдері, сонау көне дəуірден бастап қазіргі кезеңге дейінгі тарих куəлары аяқ аттап басқан сайын «мен мұндалап» тұрады. Əсіресе көне дəуір мен ортағасырлар тарихынан сыр шертетін тарихи ескерткіштер барша тарихшы ғалымдардың назарынан тыс қалған емес. Бұл аумақта қола дəуірінің қайталанбас ескерткіштері, тасмола мəдениеті ашылып, қазақ тарихының ұлы ескерткіштері Алаша хан кесенесі, Жошы хан кесенесі, Едіге мырза есімімен аталатын тау жəне т.б. орналасқан.
Ежелгі кезден тау-кен ісі дамып, ортағасырлардағы көшпелі тайпалардың даму деңгейінің көрсеткіші қалашықтар мен бекіністер де осы территориядан орын алған.
Осылайша, ұлттың ұйысатын күні маусымның 16-сында қазақ халқының маңдайалды марқасқа сарабдал саясаткерлері, биліктің төрт бұтағының өкілдері, қоғамдық ұйымдардың жетекшілері бас қосуға жиналды.
Мемлекет басшысы Қазақстан халқына Жолдауында: «Ең алдымен, Семей аймағында Абай облысын құруды ұсынамын. Семей қаласы жаңа облыстың орталығы болады. Осы мәселені аймақ тұрғындары көптен бері айтып жүргенін білемін. Қазір ол жақта шешімін таппаған түйткілдер аз емес. Мысалы, аймақтың ішкі инфрақұрылымы әбден тозған. Кезінде Алаш арыстарының басын қосқан Семей қаласының жағдайы да мәз емес. Біз тарихи әділдікті орнатып, ұлыларымыз дүниеге келген киелі өлкені қайта жаңғыртуға тиіспіз»,-деген болатын.
Міне, сол айтулы күн де туып, Семей облысы ашылып, аумағы белгіленіп, мәслихат хатшысы, әкімі сайланды. Халық ақсарбас атап, бөркін аспанға атуда.
Ертістің екі жағасында орналасқан Семей еліміздің ірі де әсем қалаларының бірі болып табылады. Жергілікті тұрғындар ғана емес, Қазақстанның «рухани астанасының» қонақтары да осындай пікірде.
Мемлекет басшысы Қазақстан халқына Жолдауында: «Алматы агломерациясына қатысты түйткілдер көп. Облыс тұрғындары негізінен қала төңірегіне шоғырланған. Ұзынағаштағы немесе Талғардағы мәселені сонау Талдықорғанда отырып шешу оңай емес. Облыс орталығына бару үшін халықтың алысқа сабылуына тура келеді. Осы және басқа да жайттарды ескере отырып, Алматы облысын екіге бөлуді ұсынамын. Бұл өңірде Жетісу және Алматы облыстары құрылады. Алматы облысының орталығы Қапшағайда болуы керек. Ал, Жетісу облысының орталығы Талдықорғанда орналасады. Бұл қадамдар аймақтарды дамыту ісіне тың серпін береді деп санаймын. Жалпы, жаңа облыстардың құрылуы – көпшіліктің көкейінде жүрген мәселе. Кезінде облыс мәртебесінен айырылған өңірлерде тұрғындар саны азайып, тұрмыс сапасы төмендеп кеткені жасырын емес. Осы олқылықтың орнын толтыратын кез келді», – деді.
Жетісу облысының әкімі Бейбіт Исабаев өз қызметінің басты бағыттары туралы айтты, – деп хабарлайды ҚазАқпарат Жетісу облысы әкімінің баспасөз қызметіне сілтеме жасап. Журналистердің сұрақтарына жауап беру барысында Бейбіт Исабаев Мемлекет басшысының тапсырмасына сәйкес ең алдымен халықтың тұрмыс жағдайына, денсаулығына, лайықты табыс табуына, жұмыспен қамтамасыз етілуіне басты назар аударылатынын жеткізді.
«Екінші, әділдік принципі. Заңның баршаға ортақ болуын, заңның басымдығын қамтамасыз етуіміз керек. Әлеуметтік әділетсіздік болмауы керек, әлеуметтік әділеттілік принципін сақтауымыз керек», – деді облыс әкімі медицина мамандарын кәсіби мерекесіне арналған салтанатты шарада.
Сол сияқты табиғаты көркем, суы мол өңірде ауыл шаруашылығы, өңдеу өндірісі, туризм салаларын дамытуға, аймаққа жаңа инвесторлар тартуға басымдық беру керек деп топшылайтынын айтты.
Референдумның соңын ала басталған барлық саладағы жаңғыру жолдарын жұртшылық өкілдері бірден байқады. Республика аумағында үлкен серпілісті қадамдар тың қарқынмен басталды.
Қаланың облыс орталығына айналған жемісті жылдары ел тарихының мақтанышпен айтар бір парасы екенін айтқан дұрыс. Бүгінде күллі түркі дүниесінің, тіпті әлемнің назарына іліккен көне шаһардың экономикалық-мәдени дамуы өз биігінде қалыптасып жатыр. Бәрінен бұрын Түркістан облысының қарапайым тұрғындары мен билік өкілдері Арыс қаласындағы тосын оқиға мен Мақтаралдағы апатты жағдайда, зардап шеккендерге жедел қол ұшын беріп, мұсылман халқына тән адамгершілік пен қайырымдылықтың ерен үлгісін көрсетті.
Ажары ашылып, базары кірген, түрленіп, қайта түлеген өңірдің еңбектен табар бақыты алда. Жергілікті тұрғындардың да әлеуметтік ахуалы жақсарған үстіне жақсара түсуде.
Түркістан облысын газдандыру бағытындағы жүйелі жұмыс бар. Облыс әкімі Дархан Сатыбалдының төрағалығымен өткен мәжілісте Созақ, Сауран, Бәйдібек, Ордабасы аудандары мен Кентау және Түркістан қалаларын газбен қамту жұмыстары мен өзекті мәселелері талқыланды. Өңір басшысы аудан, қала әкімдеріне жұмысты ширатуды тапсырып, бірқатар жауапты тұлғаға ауызша ескерту берді.
– Аудандар мен қалаларды аралау барысында тұрғындар коммуналдық-шаруашылық, әсіресе, газ мәселесін көтереді. Тұрғындарды газбен қамту – біздің міндетіміз. Жұмысын дұрыс атқармаған мердігерлермен заң аясында сөйлесіңіздер. Газбен қамту бойынша аудандар Жол карталарын ұсынсын. Осы бір жоспар негізінде жүйелі жұмыс атқарайық. Екіншіден, аудан, қала әкімдіктері мен басқармалар арасында байланыс болуы керек. Хабарласып, ел мүддесіне қатысты әрбір мәселені жедел шешуді қолға алған жөн. Газды күтіп отырған ауылдар бар. Кезең-кезеңімен бюджетке енгізіп, тиісті жұмыстарды атқару қажет, – деді Дархан Сатыбалды.
Түркістан облысының энергетика және тұрғын үй-коммуналдық шаруашылық басқармасы басшысының орынбасары Роза Сариеваның айтуынша, 2022 жылғы 1 қаңтардағы жағдай бойынша 831 елді мекеннің 457-сі табиғи газбен қамтылған. Елді мекендегі халық санымен есептесе, 1 млн. 529 мың тұрғын немесе тұрғындардың 73,7 пайызы табиғи газды қосу мүмкіндігіне қол жеткізген.
2022 жылы 70 нысанның құрылысына 15,9 млрд. теңге бөлініп, оның ішінде 9 нысанның (10 елді мекен, 1 АГТС, 32198 тұрғын) құрылысы 2022 жылы аяқталады. Қалған 61 нысан 2023 жылға өтпелі.
Биылғы жыл қорытындысымен, 467 елді мекен (56,2%) немесе 1 млн. 561 мың халық (75,2%) табиғи газды қосуға мүмкіндік алады.
Алдағы 3 жылда қосымша 255 елді мекенді табиғи газға қосып, нәтижесінде 2025 жылы қамту деңгейі 722 елді мекенге (86,8%) немесе 2 млн. халыққа жеткізілмек.
Биыл басқарманың мамандары аудан, қала әкімдіктерімен бірлесіп, құрылысы жүргізіліп жатқан нысанның 70-іне зерделеу жұмыстарын жүргізіп, оннан астамынан кемшіліктер анықталған. Тиісті ұсыныстар беріліп, кемшіліктерді жою жұмыстары қолға алынған.
Таяуда Түркістан облысы ауыл шаруашылығы қызметкерлері күніне арналған «ALTYN KÚZ – 2022» мерекесі ұйымдастырылды. Салтанатты жиында Түркістан облысының әкімі Дархан Сатыбалды өңірдің еңбеккерлерін төл мерекелерімен құттықтап, олардың жетістіктерін жоғары бағалады.
– Ауыл шаруашылығы – Түркістан облысының негізгі драйверінің бірі. Ауылда өскендіктен бұл саланың ерекшелігін, қиындығын жақсы білемін. Еңбек адамы – елді алға бастайды. Сіздердің еселі еңбектеріңіздің арқасында өңірдің агроөнеркәсіп кешені тұрақты дамып келеді. 10 айдың өзінде жалпы өнім көлемі өткен жылдың тиісті кезеңінен 145,3 млрд. теңгеге артып, 951 млрд. теңгеге жетті. Егіс көлемі 14 мың гектарға ұлғайып, 860 мың гектарға дейін жетіп отыр. Жаңадан 113 гектар жылыжайлар салынып, жалпы көлемі 1625 гектарға дейін ұлғайды. Ет өнімдерін экспортауда өңіріміз республикада бірінші орында тұр. Мемлекет басшысы Қасым-Жомарт Кемелұлы алдағы үш жылда азық-түлік қауіпсіздігі мәселесін түбегейлі шешу міндетін қойып отыр. Бұл бағытта жұмыс жүріп жатыр. 2023 жылдан бастап ауыл шаруашылығы жобаларына, кооперация желілерін дамытуға жылдық мөлшерлемесі 2,5 пайызбен жеңілдетілген несиелер беріледі. Сіздермен бірге облыстың аграрлық саласын жаңа бағытта дамытып, ел табысы молаярына сенемін, – деген Дархан Сатыбалды бір топ еңбек озатын арнайы марапаттады.
Атап айтсақ, ҚР Ауыл шаруашылығы министрлігінің «Еңбек ардагері» медалі, «Ауыл шаруашылығы саласының үздігі» төсбелгісі, «Құрмет» грамотасы тапсырылды. Сонымен бірге агроөнеркәсіп кешенін дамытуда озат атанған аудан әкімдері облыс әкімінің дипломына ие болды. Бірінші орынды Сайрам ауданы еншілесе, екінші және үшінші орындарды Бәйдібек пен Сарыағаш аудандары еншіледі.
Салтанатты жиында Түркістан облыстық мәслихатының хатшысы Қайрат Балабиев облыстың озат агроқұрлымдарын облыс әкімінің дипломымен марапаттаса, ауыл шаруашылығы мен еңбек адамын насихаттап жүрген БАҚ өкілдеріне де құрмет көрсетілді. Оларға облыс әкімінің алғысхатын Облыстық ауыл шаруашылығы басқармасының басшысы Тұрғанбек Оспанов тапсырды.
Мерекелік кеште Түркістан өңірінің танымал өнерпаздары мен белгілі әнші Мәдина Сәдуақасова өнер көрсетіп, Түркістан өңірінің ауыл шаруашылығы саласы өкілдерін мерекемен құттықтады.
Түркістан облысында ауыл шаруашылығы қарқынды даму үстінде. Ауыл шаруашылығының негізгі капиталына 56,5 млрд. теңгеге инвестициялар тартылып 116,1 % ұлғайды. Тамақ өндірісіне 6,7 млрд. теңге инвестиция салынды.
Түркістан облысын дамытудың кешенді жоспарын аясында Түркістан қаласы айналасында 11,0 мың гектар азық-түлік белдеуін құру жобасы жүзеге асырылуда. Құны 6,5 млрд. тг құрайтын 5 инвестициялық жоба іске асырылды және 2 мың гектарға жаңбырлатып суғару технологиясы орнатылды.
Дәнді дақылдар өткен жылмен салыстырғанда 190 мың тоннаға артып, 777,0 мың тоннаға жетсе, көкөніс, бақша өнімдері көлемі 120 мың тоннаға артып, 3 млн. 245,5 мың теңгеге жеткен. 2022 жылдың 10 айының қорытындысымен жалпы 1 066,5 мың тонна өнім экспортталып, 354.7 млн. АҚШ долларын құрады.
Түркістан облысында жаңа бизнес-идеяларды жүзеге асыруға арналған «Әкім гранты» жобасы бойынша қолдау көретін азаматтардың саны артпақ. Түркістан облысының әкімі Дархан Сатыбалды жоба аясында ауыл жастарын қолдауға бағыттауға басымдық беруді тапсырды. Бұл мақсатта қосымша қолдау тетігін қарастыруды жүктеді. Облыс басшысына шағын және орта кәсіпкерлікті қолдау және дамыту туралы баяндалды.
Өңір басшысы сала мамандарына «Түркістанда жасалған» брендін дамытуды міндеттеді. Оңтүстіктің негізгі драйвері – аграрлық саланы одан әрі дамытып, еңбек өнімділігін түбегейлі арттыруға және өңделген өнімнің экспортын ұлғайтуға бағытталуы керек екенін айтты. Сонымен бірге, ұлттық қолөнерді дамытуға басымдық беруді міндеттеді.
– Түркістан өңірінде өте еңбекқор халық тұрады. Біз бизнесті дамытудың үлгісін көресете білуіміз керек. Бизнес – халыққа қажетті жоба. Тек сауда саласын ғана емес, барлық бағытты игеріп, көш басында жүруге жағдай жасалу керек. Жаңа бір бизнестің көзін тауып, оны ширату қажет. Жаппай жандандырып, отандық брендті дамыту керек. Екіншіден, жеңілдетілген несие ұсынылып қана қоймай, одан нақты нәтиже шығатындай жоспар болғаны жөн. Тұрғындарды кәсіпкерлікке баулу, отандық өндіріс көлемін арттыру бағытында жұмыс жандандыруды тапсырамын , – деді облыс әкімі Дархан Сатыбалды.
Басты мақсат – шағын және орта бизнестің экономикадағы үлесін 2025 жылға қарай 30% жеткізу. Облыстағы кәсіпкерліктің саны 26,5 мыңға артып, 171 мыңнан асты. Жыл басынан бері кәсіпкерлер жеңілдетілген 6%-бен «Бизнестің жол картасы 2025» және «Қарапайым заттар экономикасы» бағдарламалары арқылы 28,8 млрд. теңгеге несиеленді. Биыл кәсіпкерлер 17 млрд. теңге несие алып, соның 54%-ы (яғни 9,2 млрд. теңгесі) «Даму» қоры арқылы кепілдендірілді.
Түркістан облысында кәсіпкерлерге 1%-дық несие беру бойынша «Жібек Жолы Бизнес» бағдарламасы дайындалып жатыр. Сондай-ақ өңірде кәсіпкерлерге арналған «кіші өндірістік парктерді» құру көзделген.
Түркістан облысы бойынша «Жайлы мектеп» ұлттық жобасына Түркістан облысынан 63 мектеп енгізіліп, бекітілді. Бұл жөнінде жақында облыс әкімі Дархан Сатыбалдының төрағалығымен өткен аппарат отырысында айтылды. Өңір басшысының міндетін атқарушы аймақтағы мектеп тапшылығын жою, апатты және үш ауысымды мектептер мәселесін түбегейлі шешу бағытындағы жұмыстарды жүйелеуді әрі ширатуды тапсырды.
– Бюджетке енгізіліп, жобалық-сметалық құжаты әзірленген әрбір нысан уақтылы әрі сапалы салынуы тиіс. Жауапты басқарма басшыларына өңірдегі құрылысы жүріп жатқан әлеуметтік нысандарды зерделеп, қадағалауды тапсырамын. Әсіресе бүгін талқыланып отырған білім ұяларының құрылысын қатаң қадағалау керек. Бұл ретте аудан, қала әкімдері өз аймақтарыңыздағы нысандардың құрылысын тиісті басқармалармен бірге күнделікті бақылауда ұстаңыздар. Екіншіден, сәулетке жауапты басқарма өңірдегі мектеп ғимараттарын салуда бір үлгіні ұсынсын. Қыруар қаржыға салынған кейбір нысандардың сәулеті талапқа сай емес. Үшіншіден, тапсырысты алып, жұмысты бастамаған немесе сапасыз атқарған мердігерлер тізімі әзірленіп, жосықсыз мердігерлер қатарына енгізілуі тиіс. «Жайлы мектеп» жобасы бойынша да жер телімдері мен құжаттарын жедел әзірлеу қажет. Жұмысты ширатыңыздар, – деді Дархан Сатыбалды.
Түркістан облысының адами әлеуетті дамыту басқармасының басшысы Д.Болатханұлы мен Облыстық құрылыс басқармасының басшысы Т.Үсіпәлиевтің мектептер құрылысы бойынша баяндамалары мен есептері тыңдалды.
Қазақстан Республикасының Президенті Қасым-Жомарт Тоқаевтың тапсырмасын орындау мақсатында «Жайлы мектеп» ұлттық пилоттық жобасын іске асыру шеңберінде 2023-2025 жылдары Түркістан облысында 63 мектептің (жобалық қуаттылығы – 57300 орын) құрылысын салу жоспарланған. Оның ішінде: 300 орындық 11 мектеп, 600 орындық 16 мектеп, 900 орындық 17 мектеп, 1200 орындық 8 мектеп, 1500 орындық 5 мектеп, 2000 орындық 6 мектеп салынбақ. Қазіргі таңда 55 мектеп салынатын жер учаскісіне меншік құқығын беретін мемлекеттік актісі алынған, қалған жер телімдері бойынша жұмыс жүріп жатыр. 2024 жылы жалпы 29 мектептің, 2025 жылы 34 мектептің құрылысын аяқтау межеленген. Білім нысандарының құрылысы «Samruk-Kazyna Construction» АҚ бірыңғай операторы арқылы жүзеге асырылады. Д.Амангелдіұлы аталған нысандарға қажетті жерді, инфрақұрылымды, газ, электр, су мәселелерін жедел шешіп, құрылысқа айындықты бастау жөнінде тапсырма берді.
Жиында өңірдегі құрылысы жүріп жатқан мектептер мәселесі де қаралды. Сонымен бірге жұмыстары кешеуілдеп жатқан нысандардың жай-күйі сарапталды. 2022 жылы Түркістан облысында 54 мектептің құрылыс жұмыстарын жүргізуге 20,3 млрд. теңге қаржы қаралған. Жыл соңына дейін 22 мектепті (5100 орын) пайдалануға тапсыру жоспарланған. Бүгінгі таңда 8 мектеп (Мақтаарал, Сарыағаш-2, Келес, Төлеби-2, Түлкібас-1, Бәйдібек аудандарында) ел игілігіне берілді. Қалғандары жыл соңына дейін тапсырылады деп көзделіп отыр.
Аппарат отырысында облыс бюджетінің орындалу барысы да талқыға салынды. Облыстық қаржы және мемлекеттік активтер басқармасының басшысы А.Тасыбаевтың айтуынша, облыс бойынша 2022 жылдың 25 қарашасындағы дерекке сәйкес, жергілікті бюджетке түсетін салықтар мен басқа да түсімдердің жоспары 92,6%-ға орындалып отыр. Тиісті жұмыс атқарылса, барлық аудан, қалаларда кірістер жоспары толық орындалады деп күтілуде.
Қаржыны игеру барысындағы мәселелер де айтылды. Дархан Сатыбалды аудан, қала әкімдері мен басқарма басшыларына қаржыны игеру, сол арқылы өңір инфрақұрылымын жақсарту бойынша жұмысты жандандыруды тапсырды.
Мемлекет басшысының Түркітілдес елдерді біріктіретін арнайы экономикалық аймақ құру туралы тапсырмасы аясында Түркістан қаласында «TURAN» арнайы экономикалық аймағы құрылмақ. Ол қолданыстағы «TURKISTAN» АЭА аумағында құрылатын болады. «TURAN» АЭА аумағында қолданыстағы заңнамада шектеу қойылған қызмет түрлерінен басқа экономикалық қызмет түрлерінің «өңдеу өнеркәсібі» секциясына жататын қызметтің барлық түрі қамтылады. Аймақта халықаралық, өңірлік стандарттары және дауларды шешуде британдық (Арбитраж) құқықты қолдану мүмкіндігі қарастырылған. Түркістан облысының әкімі Дархан Сатыбалды маңызды жобаның жүзеге асыру барысын талқылау мақсатында жауапты сала басшыларының басын қосты.
– Біздің басым бағыттардың бірі – өндіріс және жұмыс орындарын ашу. Осы бағытта бар мүмкіндікті қарастырамыз. Бұл ретте Түркі мемлекеттерінен де инвестиция тартудың маңызы зор, – деді өңір басшысы.
Қараша айында Самарқанд қаласында (ӨР) Түркітілдес Мемлекеттер Ұйымына мүше елдердің Мемлекет басшыларының қатысуымен өткізілген Саммитінде «TURAN» АЭА құру туралы Қазақстан Республикасының бастамасы барлық мүшелер тарапынан қолдау тапты. Негізгі мақсат – Түркістан қаласын жеделдете дамыту және Түркістан қаласының инвестициялық әлеуетін жоғарылату. Оның аумағы 4 гектарды құрап, 6 қосалқы аймақтан тұрады. Олар: Тарихи орталық, Әкімшілік-іскерлік орталық, Greenfield (Оранғай ауылы), Brownfield өнеркәсіптік қосалқы аймағы (Кентау қаласы) және Түркістан қаласы мен халықаралық әуежай аумағы.
Облыста 2022-2026 жылдар аралығында жүзеге асырылатын жалпы құны 1,9 трлн. теңгеге 9596 жаңа жұмыс орынын құрайтын 71 инвестициялық жобаның тізбесі қайта өзектендірілді. Оның ішінде шетелдік капиталдың қатысуымен жалпы құны 225,6 млрд. теңгеге 915 жұмыс орнын құрумен 9 жоба бар. Жыл соңына дейін жалпы құны 29,9 млрд. теңгеге 1197 жұмыс орнын құрумен 25 инвестцииялық жобаны жүзеге асыру жоспарланған. Қазіргі уақытта жалпы құны 17,7 млрд. теңгеге 1 мыңға жуық жұмыс орнын ашумен 18 инвестициялық жоба іске қосылды. Одан бөлек, облыста өңдеу өнеркәсібін дамыту үшін жалпы құны 1,4 трлн. теңгеге 3595 жұмыс орнын ашатын ірі инвестициялық жобалар жүзеге асырылуда.
Таяуда Түркістан облысының әкімі Дархан Сатыбалды Венгрияның Қазақстандағы төтенше және өкілетті елшісі Отто Иван Ронамен кездесті. Өңір басшысының міндетін атқарушы Қазақстан мен Венгрия арасындағы байланыстың жоғары деңгейде екенін айта келе Венгрия инвестициясын тартуға, екі жақты қарым-қатынасты тереңдете түсуге мүдделі екенін айтты.
– Түркістанға қош келдіңіз! Бүгін біздің облыс пен Венгрия арасындағы екіжақты қарым-қатынастарды дамытуға қатысты пікір алмасуға жақсы мүмкіндігіміз бар. Өздеріңіз білетіндей, 2018 жылғы Түркістан облысы құрылды, оның әкімшілік орталығы Түркістан қаласы болып бекітілді. Қалаға облыс орталығы мәртебесін беру қалаға ғана емес, бүкіл өңірге инвестиция тартуға айтарлықтай серпін берді. Нәтижесінде өткен жылы инвестиция көлемі 60% – ға өсіп, 1,7 млрд. АҚШ долларын құрады. Біз Венгрия инвесторларын қарсы алуға, бірлесе жұмыс істеуге дайынбыз. Бұл ретте «TURAN» арнайы экономикалық аймағы құрылып жатыр. Ауыл шаруашылығы бойынша өңірдің әлеуеті зор. Инвестициямен қатар мәдениет, білім салаларында да әріптестік орнатуды жөн деп білемін. Осындай кездесулер арқылы байланыстар көкжиегі кеңейе түседі, – деді Д.Сатыбалды.
Венгрияның Қазақстандағы төтенше және өкілетті елшісі Отто Иван Рона да Түркістандағы мүмкіндіктерді қарастырып, өз елінің бизнес өкілдеріне мәлімет ұсынатынын жеткізді.
– Жаңа Қазақстанды құру үрдісі жүріп жатқанын білеміз. Түркістанның тарихи рөлі туралы да хабардармыз. Жалпы Венгрия мен Қазақстанның тарихында ортақ дүниелер бар. Арнайы экономикалық аймақтарыңыз бен ұсынылатын мүмкіндіктер туралы толық ақпарат берсеңіздер оны зерделеуге дайынбыз. Әрине, бизнеске тікелей әсер ете алмаспыз, бірақ екі ортада байланыс орнатушы ретінде инвестиция салуға да, тартуға да ниеттіміз. Біз ақпараттық технология, ауыл шаруашылығы, фармацевтика, балық шаруашылығы, жүгері шаруашылығы, құс фабрикаларын дамыту бойынша ұсыныстар бере аламыз деп ойлаймын. Келесі кездесуімізде нақты ұсыныстарды қарастырып, келісім жасаймыз деген сенімдемін, – деді Венгрия елшісі.
Түркістан тарихында тұңғыш рет қысқы спортпен кәсіби түрде айналысуға мүмкіндік жасалады. Түркістан облысының әкімі Дархан Сатыбалды Түркістан қаласының дамуында аса маңызды бірқатар құрылыс нысандарын аралады. Солардың бірі – қысқы спорт түрлеріне арналған ғимарат. Мұз сарайының жалпы жер аумағы 2 гектарға жуық. Ғимарат құрылысының көлемі – 4160,9 шаршы метр. Нысанның құрылысы келер жылдың көктемінде аяқталады деп жоспарланған. Бұл ғимаратта қысқы спорт түрлері дамытылып, үйірмелер ашылады. Жақын уақытта мұз айдынына керекті құрал-жабдықтар сатып алынады.
Өңір басшысы Түркістанды абаттандыру жұмыстары мен бірқатар құрылыс нысандарының жай-күйін бағдарлау үшін шаһарды кезекті рет аралап шығып, мәдени-тарихи орталықтағы абаттандыру және көгалдандыру жұмыстарын тексерді.
Биыл Түркістан қаласында жалпы көлемі 200 мың шаршы метрден асатын 3392 пәтерлі 53 үйдің құрылысы жүргізіліп жатыр. Түркістан облысының әкімі Дархан Сатыбалды әкімшілік-іскерлік орталығындағы көпқабатты тұрғын үйлердің жай-күйімен танысты. 5,7,9,12 және 20 қабатты 60 тұрғын үйдің құрылыс алаңында болды. Пәтерлердің жалпы ауданы 35 мың шаршы метрге жуық.
– Салынып жатқан үйлердің сапасы талапқа сай болуы тиіс. Халықтың талабы мен сұранысына жауап беруі керек. Бұл – өте маңызды. Құрылыс материалдарының сапасына мән беріңіздер. Үйлердің айналасын абаттандыру да аса маңызды. Балаларға арналған алаңдардың сапасы мен қауіпсіздігі – басты назарда. Сейсмикалық төзімділігі қатаң қадағалауда болуы міндетті. «Мұз сарайы» да өз уақытында салынып, елге қызмет көрсетуі қажет. Өңірде спортты дамытуға да қолайлы жағдай жасалады, – деді Дархан Сатыбалды.
Жыл басынан бері жаңадан салынған 42 көпқабатты үй пайдалануға берілді. Яғни, несиемен және кезекте тұрған 2 мыңнан астам отбасы баспаналы болып, қоныс тойын тойлады. Жыл соңына дейін тағы 11 көпқабатты тұрғын үй құрылысы толық аяқталады. Сол арқылы тағы 725 пәтер пайдалануға беріледі.
Облыс әкімі құрылыс жұмыстарының сапасын қатаң бақылауда ұстауды, инженерлік-инфрақұрылым жүйелерінің құрылысы мен абаттандыру жұмыстарын ширатуды тапсырды.
Жаңадан құрылған үш облысқа елдің әлеуметтік-тұрмыстық жағдайын көтеру, өңірді экономикалық дамыту – маңызды міндет. Түркі дүниесінің киелі қара шаңырағына айналуға бағыт ұстап, қарыштап дамып келе жатқан өңірдің бейнеткеш халқы мен билік өкілдерінің бірлесе атқарып жатқан қажырлы қызметтері мен жұмысына, жыл он екі ай құмырсқаша қыбырлап бар жобаны жүзеге асырып жатқан құрылысшыларға арқа сүйегендік деп түсінуге болады.
«Еңбек атаулының бәрі де бағалы, өйткені ол адамды ізгілендіреді», – деп Лев Толстой айтқандай, тынымсыз тірлі-гімен ізгі қаланың тұрғындары атағына ие болуға бағдар ұстаған түркістандықтардың жаңа облыс тұрғындарымен іс-тәжірибе алмасуға қашанда құштар.
«Жаңа Қазақстанның» шаңырағын бірлесе көтеріп, уығын шаншуға әрбір қазақстандық мүдделі.
