Түркістан қаласында діни экстремизм мен терроризм көріністерін болдырмау мақсатында бірқатар іс-шаралар атқарылуда. Түркістандағы «Әзірет Сұлтан» мемлекеттік тарихи-мәдени музей-қорығында, қоғамдық орталар мен білім орталарында «Діни экстремизм мен терроризмге қарсы күрес» тақырыбында кездесу жиындары өтуде. Жиындарда мамандар ҚР діни экстремизм мен терроризмге қарсы іс-қимыл жөніндегі түсіндірме жұмыстары жүргізілуде. Мекеме ұжымымен кездескен мамандар Жаңа діни қозғалыстар тақырыбында әңгіме өрбітіп, олардың сипаттары мен ерекшеліктеріне кеңінен тоқталуда. Мамандардың айтуынша, Қазақстандағы деструктивті діни ұйымдарға қатысты мәселелердің маңыздылығы біздің халқымызға жат діни және псевдодіни ағымдардың мәселелері күн тәртібінде тұрғандығы айтылуда. Бұл тұрғыда осындай ағымдардың деструктивті әсеріне жастардың көптеп ұшырайтыны тілге тиек етілді. Сондай-ақ, түркістандық жастарға біздің біреулердің жетегінде кетпей, өзіміздің дәстүріміз бен мәдениетімізге тән діни сана қалыптастыру қажет екендігі айтылуда. Мұндай шаралар бүгінгі қалыптасып отырған жағдайда ауадай қажет болып табылады.
2022 жылдың 10 айында 9 экстремистік және террористік сипаттағы қылмыс анықталған болатын. Оның ішінде ҚР ҚК-нің 405-бабы (Қоғамдық немесе дiни бiрлестiктiң не өзге де ұйымның экстремизмдi немесе терроризмді жүзеге асыруына байланысты олардың қызметiне соттың тыйым салу немесе тарату туралы шешiмiнен кейiн олардың қызметiн ұйымдастыру және оған қатысу) бойынша 5 іс тіркелген. Ал ҚР ҚК-нің 174-бабымен (Әлеуметтiк, ұлттық, рулық, нәсiлдiк, тектік-топтық немесе дiни алауыздықты қоздыру) төрт жайт анықталды. Оған қоса полицейлер заңсыз жұмыс істеп тұрған үш намазхананы анықтап, құқық бұзушыларға қатысты әкімшілік хаттама толтырылды. Ал жүргізілген рейдтік іс-шара барысында экстремистік құқық бұзушылықтың алты дерегі бойынша 428 діни әдебиет алынды. Жергілікті құрылымдармен деструктивті діни ағымдарының ұстанушылары жасаған жалпы 846 әкімшілік құқық бұзушылық анықталып, тиісті шара қолданылды. Барлығы 1,7 млн теңгеге жуық айыппұл салынды. Мысалы, осы жылы облыс аумағында жергілікті атқарушы органдардың тиісті рұқсатынсыз сауда орындарында, базарларда, дүкендерде діни әдебиеттерді сатқаны үшін 11 тұлғаға қатысты ҚР ӘҚБтК-нің 490-бабы бойынша әкімшілік хаттама толтырып, сот шешімімен 1-ден 50 АЕК-ге дейін айыппұл түрінде әкімшілік жазаға тартылған.
Түркістан қаласындағы мектеп оқушыларына жылына екі рет этносератаизм мен экстремизмге қарсы нұсқаулықтар директордың тәрбие ісі жөніндегі орынбасарлары таныстырып отырады. «Терроризм мен экстремизмнің алдын алу және ескерту шаралары» дөңгелек үстел, «Діни экстремизмнің әлемдік қауіп-қатері» баяндама «Қазіргі діни ұйымдар», «Діни экстремизм деген не?», «Адастырушы діни ағымдар», т.б. тақырыптарда ашық әңгіме мен тәрбие сағаттары өткізілуде. Әр өткізілген шарада оқушылар арасында қазіргі таңда әлемнің түкпір-түкпірінде болып жатқан діни экстремизм және терроризмнің алдын алуға байланысты сұрақтар қаралып талқыланды. Оқушыларға «Хиджаб, паранжа, қысқа балақты шалбар кию, сақал қою» мәселелері түсіндірілді. Дүние жүзінде діндердің таралуы бойынша біраз мәліметтер берілді. Қала бойынша бұл бағытта, заңдар қайта қаралып, толықтырылды, арнаулы бұйрықтар шығарылды. Ақпараттық түсіндіру жұмыстары күшейтілді.
