Мемлекет басшысы Қасым-Жомарт Тоқаев «Egemen Qazaqstan» газетіне берген сұхбатында 2029 жылға қарай ұлттық экономиканың көлемін екі есе арттырып, 450 миллиард долларға жеткізу көзделгені туралы айтты.
«Әрине, бұл – жетуге болатын меже. Халықаралық валюта қорының сарапшылары 2023 жылдың қорытындысы бойынша Қазақстанның Ішкі жалпы өнімі қазіргі бағамен есептегенде 259 миллиард доллардан асады, яғни 2022 жылмен салыстырғанда 15 пайызға артады деп бағалап отыр. Бұл – Орталық Азиядағы ең жоғары ақшалай өсім. Жан басына шаққандағы ішкі жалпы өнім де өсіп келеді. Бұған қатысты болжамды көрсеткіш былтыр 13 мың долларға жуықтады.
Оның жыл сайынғы өсімі 1,6 мың доллар болады деп бағаланып отыр. Халықаралық валюта қорының болжамына сәйкес, 2028 жылға қарай бұл көрсеткіш отыз пайыздан да көбірек артып, 16,8 мың долларға жетеді. Шын мәнінде, мен үшін макроэкономикалық көрсеткіштер соншалықты маңызды емес, азаматтардың тұрмыс сапасының іс жүзінде жақсаруы одан әлдеқайда маңыздырақ», деді Мемлекет басшысы.
Президент Үкімет экономиканы басқарудың тың тәсілдерін қолдана алса, жаңа айтылған жақсы болжамдар ақиқатқа айналатынын айтты.
Осы орайда, Түркістан облысында өңдеу, өндірісті дамыту, зауыттар ашу, инвестиция тарту бағытында қарқынды жұмыс жүріп жатыр. Бұл орайда арнайы экономикалық және индустриалды аймақтардың алар орны ерекше екені анық.
Облыс орталығындағы «Turkistan» индустриалды аймағында таяуда ғана жиһаз цехы ашылды. Жобаның жалпы құны – 2,3 млрд теңге, 50-ге жуық жаңа жұмыс орны құрылған. Заманауи технологиялармен жабдықталған цех күніне 600 дана жиһаз шығаруға қауқарлы. Аталған цех облыс мектептерін, балабақшаларын, сонымен бірге, өңірде ашылып жатқан ғимараттарды толықтай жиһазбен қамтуға үлес қоспақ.
Сондай-ақ «Түркістан» ӘКК» АҚ-ы тарапынан «Turkistan» индустриалды аймағындағы Brownfield өндірістік ғимаратына инвесторлар тартылып, шұлық және шұлық бұйымдарын шығаратын кәсіпорын іске қосылды. Қазақстан мен Қытай инвесторларының бірлескен жобасының құны – 1 млрд теңге. Кәсіпорын күніне 32 мың жұп шұлық шығаруға қауқарлы, 30 жұмыс орны ашылған. Облыс әкімдігінің қолдауымен инвесторларға арнайы жер ұсынылған. Өндірістік браунфилд ғимаратымен қамтылған. Инвесторлар шұлық фабрикасы толық қуатына жеткен соң Түркістанда костюм шығаратын жобасын да жүзеге асырмақ. Бұл жобаға 2,8 млрд теңге инвестиция салынады. Күніне 500 костюм тігіледі деп жоспарланып отыр.
Ал Түркістандағы «TURAN» арнайы экономикалық аймағында сэндвич-панель шығаратын жаңа зауыттың капсуласы салынды. Оған облыс әкімі Дархан Сатыбалды мен инвесторлар қатысты. «Мемлекет басшысы Қасым-Жомарт Кемелұлының тапсырмасына сәйкес, облысымыздың өңдеу өнеркәсібін дамыту үшін және қала тұрғындарына жұмыс орындарын ашуға үлесін қосатын «TURAN» арнайы экономикалық аймағында жаңа зауыт құрылысы басталғалы тұр. «Panel Sistem KZT» компаниясының жобасының іске қосылуы облыстың әлеуметтік-экономикалық дамуына тың серпін беріп, отандық өнімдермен қамтамасыз ету көлемін арттыруға және халықтың әл-ауқатын көтеруге өз септігін тигізеді. Аталған өнеркәсіпте өндірілетін сэндвич-панельдер келешекте өңірдегі іске асырылатын жобалардың құрылысына қолданылады», деді Дархан Сатыбалды. Бұл жобаның инвестициялық құны – 1,54 млрд теңге, 30-дан астам жаңа жұмыс орны ашылады. Аталған зауыттың жылдық қуаттылығы – 250 мың шаршы метр. Онда сэндвич-панельдер, гофрленген қаңылтырлар, металл плиткалар және өзге де құрылысқа қажетті заттар шығарылады деп жоспарланған. Бүгінде зауыт салынатын жер телімі бөлініп, тиісті жұмыстар басталып кеткен. «Panel Sistem KZT» компаниясының бұл жобасы биыл жүзеге асады.
Облыста сүт кластерін іске асыру мақсатында жаңа өндіріс орындарын салу «Түркістан» ӘКК» АҚ тарапынан бірнеше ауқымды жоба қолға алынған. Соның бірі – құны 3,3 млрд теңге болатын Сауран ауданындағы тауарлы-сүт фермасын салу жобасы. Мақұлданған қаражатқа тауарлы-сүт фермасының жабдықтары Түркиядан әкелініп жатыр. Ал Даниядан ірі қара сатып алу жоспарланған. Қазіргі уақытта құрылыс алаңына қажетті металл конструкциялардың 80%-ы жеткізілді. Сүт-тауар фермасын жем-шөппен қамтамасыз ету мақсатында кәсіпорын 1 322 гектар суармалы егістік алқабына жоңышқа, жүгері, бидай дақылдарын егуді жоспарлап отыр. Сонымен қатар ферма аумағында 80 гектар жерде 2 жаңбырлатып суару машиналары орнатылуда. Кәсіпорын қажетті ауылшаруашылық техникалармен толық қамтылған. Ал «Sultan Agro Group» ЖШС-ның 600 бас сүт-тауар фермасын салу жобасының құны – 4,3 млрд теңге. Қазіргі кезде қажетті жабдықтар мен техникалар алынған. Жоба биыл мамыр айында іске қосылып, жылына 5000 тонна сүт өндіреді, сондай-ақ 50 жұмыс орны ашылады.
Бұдан бөлек облыста «Бөрте Милка» ЖШС, яғни 403 басқа тауарлы-сүт фермасын ұлғайту жобасы іске асырылады. Жобаның жалпы құны – 2,8 мрд теңге. Қазіргі уақытта ферманың жаңа ғимаратының іргетасы аяқталуға жақын. Сондай-ақ жемшөп сақтау қоймасының құрылысы жүргізілуде. Қора конструкцияларына қажетті құрылыс материалдары толық көлемде сатып алынды. Ордабасы ауданындағы бұл жоба биыл сәуір айында іске қосылады деп жоспарлануда. Нәтижесінде, 35 жаңа жұмыс орны ашылып, жылына 2 700 тонна сүт өндірілмек.
Сондай-ақ Ордабасы ауданының индустриалды аймағында орналасқан «KARLSKRONA LC AB» ЖШС мемлекеттің экономикалық дамуына өздерінің лайықты үлестерін қосуда. Аталған компания сусорғыларды, электротехникалар, блокты-модульдік, стандартты емес жабдықтарды, түрлі темір қорытпаларынан құймаларды жасау, әзірлеу, сату, монтаж жасау және сервистік қызмет көрсетумен айналысады. Шығарылған өнімдер Түркия мен Үндістанға және Қазақстан қалаларына жіберіледі. Аталған компания 200-ге жуық адамды тұрақты жұмыспен қамтып отыр.
Қазіргі уақытта Бадам ауылдық округінде орналасқан кәсіпорын мұнай, тау-кен және атом өнеркәсібінде, ауыл шаруашылығы және коммуналдық шаруашылық салаларында қолданылатын жабдықтарды шығаруда. Қазақстандық нарықта 2003 жылдан бері жұмыс істеп келе жатқан компания өткен жылы 20 жылдық мерейтойын атап өтті. Сондай-ақ, зауыттың өндірістік және басқару процестері ISO 9001, ISO 14001, ISO 45001 халықаралық стандарттарына сәйкес жұмыс істейді.
Бұдан бөлек, биыл Түркістан облысында бірнеше кәсіпорын ашылады деп жоспарланып отыр.
Инвесторлардың айтуынша, Созақ ауданындағы уран өңдейтін зауыт құрылысы бойынша жұмыстар басталған. Ал Арыста Франциялық инвестордың көмегімен электровоз жөндейтін сервистік орталық салу жоспарланып отыр. Жоба құны – 2,5 млрд. теңге. 100 жұмыс орны ашылады. Келестегі алып жылыжайдың құрылысы да жүріп жатыр. Инфрақұрылымы тартылуда. Жоба іске қосылған соң 700 адам жұмыспен қамтылады. Сайрамда жылына 4 мың тоннадан астам өнім өндіретін жылыжай құрылысы қолға алынған. 150 адам жұмыспен қамтылмақ. Төлеби ауданында үлкен тігін цехы салынуда. Қазір ғимарат тұрғызылған.
Инфрақұрылымға қатысты мәселелері бар. Ол бақылауға алынды. Жылына 150 мың дана киім тігетін кәсіпорында 150 жұмыс орны ашылады. Биыл жұмысын бастайды деп күтіліп отыр. Таяуда инвестштаб отырысында Бәйдібектегі құс фабрикасы, Арыстағы көліктік-логистикалық орталығын салу барысы талқыланды. Арыстық инвестордың айтуынша, негізгі ғимарат бой көтеруде. Биыл бірінші тоқсанда тапсырылмақ. Тоғыз жолдың торабындағы Арысты «құрлықтағы портқа», яғни, ірі сауда орталығына айналдыру көзделіп отыр.
Төлебидегі су электр станциясы мен Саурандағы сүт фермасының құрылысы да қарқынды. Сүт фермасына Шығыс Еуропадан сүтті сиырлар әкелінеді. Жоба құны – 3,2 млрд. теңге. 40 адам жұмыспен қамтылады. Аталған инвестициялық жобалардың біразы биыл жүзеге асады. Ол жұмыстар бақылауға алынып, кәсіпкерлерге қолдау көрсету бойынша тапсырмалар берілді.
Еске сала кетсек, Түркістан облысында өткен жылдың қорытындысымен негізгі экономикалық көрсеткіштер бойынша оң өсімге қол жеткізілді. Өнеркәсіп өнімінің көлемі облыста алғаш рет 1 трлн. теңгеден асып, 2022 жылдың сәйкес кезеңімен салыстырғанда 2,5%-ға артты. Өсім негізінен өңдеу өнеркәсібінен орындалды. Бұл салада 437,8 млрд. теңгенің өнімі өндірілді.
