Сонымен қатар Жетісай ауданында агросалаға қолдау күшейді. Түркістан облысы әкімінің орынбасары Ермек Кенжеханұлы бастаған жұмысшы топ Жетісай ауданында болып, аграрлы ауданның жазғы суғару кезеңіне дайындығымен, ішкі каналдардың жай-күйімен танысты. Сондай-ақ «Ауыл аманаты» пилоттық жобасы аясында несие алуға ниетті азаматтармен тілдесті. Егін егу жұмыстарын көзбен көрді. Сапар аясында облыс әкімінің орынбасары Ермек Кенжеханұлы және «Қазсушар» РМК Түркістан облыстық филиалының өкілдері бірқатар нысандарға барды. Шардара су қоймасынан машиналық әдіспен су көтеруге есептелген «Тәуелсіздіктің 20 жылдығы» каналының, Өзбекстанмен байланыстырып тұрған республикалық «Достық» магистаральды каналынан бастау алатын К-28 және К-30 каналдарының мердігерлер тарапынан толық аяқталмаған құрылыс жұмыстары тексерілді. Аудан үшін ең өзекті саналған ағын су мәселесін сала мамандарымен бірге талқылады. Сала мамандары соңғы жылдарда аудандағы өзекті мәселеге айналған ағын су мөлшерінің тапшылығы, биылғы метеожағдайға байланысты орын алған жағдайлар жайлы сөз етті.
Сондай-ақ, мамандар негізгі табыс көзін агросектордан алатын аймақ шаруаларының тозығы жеткен ағын су тарату каналдарының жөндеуден өтпеуінің салдарынан ағын су мөлшерінің көп бөлігі жерге сіңіп, буланып немесе жерасты суларының тартылып кетуі секілді себептермен егістік алқабына дейін дұрыс жетпейтінін, К-30, «Достық» магистральді каналының тармақтары күрделі жөндеуді талап ететінін жеткізді.
Ермек Кенжеханұлы Қарақай ауылдық округіндегі өз қаржысы есебінен жұмысын бастап, кейіннен «ОҢТҮСТІК» аймақтық-инвестициялық орталығынан 47 миллион теңге жеңілдетілген несие алып жалпы өндіріс қуаты тәулігіне 30 тоннадан 9 түрлі сүт өнімдерін өндіруге есептелген «Медет сүт» сүт өнімдері цехында болды. Жұмыс барысымен таныстырған цех басшысы Ғалым Олжабаев алдағы уақытта шикізат тапшылығы мәселесін толықтай шешіп, өнім көлемін ұлғайтуды, сол арқылы ауданның ішкі сұранысын толықтай қамтамасыз етуді жоспарлап отырғандығын айтты. «Ауыл аманаты» пилоттық жобасының тиімділігі түсіндірілді.
Кездесуде жұмысшы топ мүшелері тарапынан Түркістан облысы тұрғындарын тұрақты жұмыспен қамтамасыз ету, ауыл әлеуетін тиімді пайдалану арқылы ауыл экономикасын және халықтың өмір сүру деңгейін көтеруге үлкен мүмкіндіктер беретін аталмыш жобаны жүзеге асыруға биыл республикалық бюджеттен жыл басында 11 млрд теңге, қосымша тағы 8,7 млрд теңге қаржы бөлінгендігін жеткізді. Сол арқылы 4 000 бірлікке жуық жобаға қолдау көрсетілетіндігін, жобаны іске асыруда бірінші кезекте жеке қосалқы шаруашылықтарды кооперативтер негізінде дамытуға басымдылық берілетіндігін айтып, қойылған сұрақтарға жауап берді.
Инфрақұрылым саласына қатысты Түркістан облысында «Парктер шеруі» экологиялық ауиясы іске қосылды. Туған жер табиғатына ұқыпты қарауды насихаттау, экологиялық мәдениетті дамыту және құқықбұзушылықтың алдын-алу мақсатын көздеген жыл сайын дәстүрлі түрде «Парктер шеруі» экологиялық акциясы өткізіліп тұрады. Аталған акция барысында Сырдария-Түркістан мемлекеттік өңірлік табиғи паркі аумағында су айдындарын тазалау, тораңғы ағашын, қызғалдақ гүлін, жабайы аңдарды қорғау секілді шаралар өткізіледі.
Құрылғанына 10 жыл толып отырған табиғат қорғау мекемесі елімізге бұқар бұғыларының питомнигімен әйгілі. Парк аумағын басып жатқан торанғы орманы елімізде Сырдария мен Іле өзендері жағалауында ғана кездеседі. Ал Бәйдібек ауданында орналасқан Тұттыбұлақ сарқырамасы соңғы үш жылда парктің ең танымал демалыс орнына айналған.
Бұл акция аясында табиғи парк қызметкерлері экологиялық полиция өкілдерімен қызғалдақты жұлудың алын-алу рейдтеріне шықпақ. Қазіргі таңда лалагүлдерді сақтап қалу басты міндеттердің бірі дейді Сырдария-Түркістан МӨТП бас директорының орынбасары Мұрат Айтимбетов.
Екі айға созылатын экологиялық акцияның ашылуы Сауран ауданы, Құсшы ата елді мекені «Балауса» балалар сауықтыру лагерінде өтті. Өскелен ұрпаққа экологиялық тәрбие беру мақсатында мектеп оқушыларының сайысы форматында өткізілген додаға саурандық және кентаулық жас экологтар қатысты.
Балалар өз топтарын таныстырып, қоршаған ортаны қорғауға насихаттайтын сахналық көріністермен қазылар алқасының көңілінен шықса, табиғат туралы нақыл сөздер, мақал-мәтелдер айтумен жарысып, күмбірлеген күйлер ойнады. Жарыс барысында жеткіншектер өздері жасаған қолөнер бұйымдарымен көпшілікті таныстырды. Салтанатты іс-шара қатысушыларына табиғи парк әкімшілігі сияпаттар мен алғыс хаттар табыстады. Экоакцияның ашылуына орай Құсшы ата елді мекеніндегі екі мектептің аумағына орманшылар ағаш отырғызып берді.
«Ғалымдардың айтуынша Қазақстан қызғалдақтардың отаны болып табылады. Бұл керемет гүлдер Ұлы Жібек жолы арқылы Түркияға, сосын Голландияға жеткен. Ғылымдар гүл атауын парсы toliban (шығыс халқының бас киімі) сөзінен шыққан деп пайымдайды. Қазіргі таңда Қазақстан аумағында қызғалдақтың 34-тен астам түрі өссе, оның 18 түрі Қазақстанның Қызыл Кітабына енген. Бұлардың ішінен Грейг, Борщов, Берікқара (Кауфман), Түркістан, Леман, Бузе, т.с.с. танымал. Эндемиктер қатарына Колпаковский, Зинаида, Борщов, Островский, Регель, жалған қосгүлді, Альберт, Кеш қызғалдақ болып есептеледі» — деп түсіндірді М.Айтимбетов.
Естеріңізге сала кетейік, Қазақстан Республикасының Қылмыстық кодексінің 339 бабында Қызыл кітапқа, сирек, құрып бара жатқан өсімдік жануарларды жою үш мың АЕК (10 350 000 теңге) айыппұл немесе қоғамдық, түзету жұмыстарына тарту, тіпті бостандықтан айыруға әкеледі.
Түлкібас ауданында көктемнің алғышқы күндерінен бастап аудан әкімдігінің ұйымдастыруымен көгалдандыру жұмыстары қолға алынды. Атап айтсақ, Мемлекет басшысының тапсырмасына сәйкес, елімізде 2021-2025 жылдары республиканың орман алқаптарында 2 млрд. және қалалар мен елді мекендер аумағына 15 млн. ағаш көшеттерін отырғызу тапсырылған болатын. Осы мақсатта Түркістан облысы Табиғи ресурстар және табиғат пайдалануды реттеу басқармасы тарапынан елді мекендерді көгалдандыру үшін тегін көшеттер үлестірілуде. Бүгінгі таңда Түлкібас ауданына 5 700 дана көшет тегін босатылып, алдын ала дайындалған орындарға егілді.
Бұл жұмыстар алдағы уақытта жалғасын табады. Яғни, наурыз айында Түлкібас ауданындағы елді мекендерге көгілдір шырша, туя, писсарди өрігі, сәнді ағаш, қарағай және т.б. ағаш түрлерінің 22 800 көшетін отырғызу жоспарланып отыр.
Түлкібас ауданының әкімі Нұрлан Байғұт көгалдандыру жұмыстарын бақылап, аудан орталығының шығыс қақпасы маңында іске асып жатқан көшет отырғызу жұмыстарына атсалысты. Бүгін қосымша 1000 түп ағаш көшеті отырғызылды. Айта кетейік, көшеттер отырғызылатын орындар арнайы дайындалып, тиісті басқарма тарапынан бекітілген. Оны суғару, күтіп ұстау, айналасын қоршау тікелей ауыл әкімдеріне жүктелген.
Жуықта ғана мереке қарсаңында Сарыағаштық тұрғындар 1 мамыр Қазақстан халқының ынтымақ пен бірлік күніне орай аудан аумағын қоқыстан тазарту, көшет отырғызу, ақтау-сырлау жұмыстары, көше бойларын және арық-атыздарды ретке келтіру, қураған ағаш бұталарын кесу мақсатында жалпы аудандық тазалық акциясы өтті.
Аудан көлемінде жүргізілген тазалық акциясына аудан әкімі аппаратының қызметкерлері мен дербес бөлім мамандары 13 көпқабатты тұрғын үй маңында егілген көшеттерді суғарып, тазалық жұмыстарын жүргізіп, өздеріне бөлініп берілген секторларды қоқыстан тазалады. Сонымен қатар қала, кент және ауылдық округ әкімдері мен мамандары өз аумақтарында санитарлық-тазалық жұмыстарын жүргізіп, тазалық акциясына белсене қатысты. Ардагерлер де белсенді қатысып, қаланы көгалдандыру, «Саялы Сарыағаш-Сырлы Келес» аллеясына гүлдер отырғызу, көшеттерді суғарып абаттандыру жұмыстарына өз үлестерін қосты.
Ортақ іске кәсіпкерлік нысандар мен аудан тұрғындары атсалысты. Әсіресе, Сарыағаш қаласындағы Шәмші гүлзары, Қабланбек көшелерінің тұрғындары ерекше белсенділік танытса, ал, «Карима» сауда орталығы мен Көктерек кентіндегі «Сарыағаш» ЕОК ЖШС, «Арман», «Сая», «Алтын Шаңырақ», «Маржан-су», «Байқоңыр» шипажайларының жұмысшылары өз аумағында тазалық жұмыстарын жүргізіп, ретсіз тасталған қоқыстарды тазалап, көшеттер мен гүлдерді суғарып, әктеу-сырлау жұмыстарын жүргізіп, қураған ағаш бұталарын ретке келтірді. Жалпы тазалық акциясына 20-дан аса техникалар жұмылдырылды. Тазалық жұмыстары тұрғындардың қоршаған ортаны таза ұстауға, экологиялық мәдениет қалыптастыруға және ауданның санитарлық жағдайын жақсартуға оң әсерін тигізуде. Адам денсаулығының айнымас бір бөлігіне айналған табиғат тазалығын қалыптастыруға бағытталған аталмыш шара алдағы уақытта да өз жалғасын табатын болады.
Сарыағаш ауданының әкімдігі «Тазалық жинаған жерде емес, сақталған жерде болады» дегендей ауданның әрбір тұрғынын өз ауласының тазалығына көңіл бөліп, қоршаған ортаны ластамай, тазалық акциясының алдағы науқанына да белсенді атсалысуға шақырады.
Бұдан бөлек, Түркістан облысының әкімі Дархан Сатыбалды өңірдегі өзекті мәселелері бар газ нысандарын жаппай тексеруді тапсырды. Орын алған олқылықтарды шұғыл түрде талапқа сай ретке келтіріп, бір айдың көлемінде халыққа газ беруді жүктеді.
Өңір басшысына облыстағы проблемалы 10 автоматтандырылған газ тарату стансаларының бүгінгі жағдайы баяндалды. Олардың бірінің құжаты толық аяқталмаса, енді бірінде жөндеуден кейін ақау шыққан, тағы бірін қайта жаңарту қажет. Олардың басым бөлігі Сарыағаш пен Келес аудандарында орналасқан.
Әртүрлі себептермен жылдар бойы іске қосылмай тұрған маңызды нысандардың жай-күйімен танысқан аймақ басшысы осы уақытқа дейін олардың құжаты мен құрылысын созбалаңға салған жауаптыларға сын-ескертпе айтып, мәселені мұқият қарастыруды тапсырды. Атқамінерлердің сылбыр қимылын сынға алған әкім жауаптыларға мәселені шешуге бір ай уақыт берді.
Әр нысан іске қосылғанда кемі 7 ауыл тұрғыны табиғи газбен қамтылады. Облыс басшысы жауапты сала жетекшілеріне аталған мәлелені қатаң бақылауға алуды тапсырды.
Алайда Созақ ауданы Түркістан облысындағы тарихы терең өңір. Бұл аймақта қазақ халқының тарихында ойып тұрып орын алатын оқиғалар көп болған. Сырлы Созақтың бүгінгі тыныс-тіршілігі де ауыз толтырып айтарлықтай. Ауданда жасалынып жатқан игі істердің бірі «Жасыл белдеу» аумағы. Өткен жылы аудан әкімінің бастамасымен бастау алған жоба бүгінгі күні көптің ықыласына бөленген. Демеушілер есебінен атқарылып жатқан жұмыстар Шолаққорған – Түркістан тас жолы бойында жүргізілуде. өткен жылы 3 гектар жерге 3500 түп көшет отырғызылса, биыл бұл көрсеткіш тағы да 2000 талға ұлғайған. Аудан басшылары жұмыстардың әрмен қарай да жалғасын табатынын жеткізіп отыр. Белдеудің тазалық жұмыстары да назардан тыс қалмаған. Аудандағы барлық мемлекеттік мекеме қызметкерлері әр апта сайын сенбілік ұйымдастырып, өңірдің көркейуіне өз үлестерін қосып жатыр. Сырлы Созақта шағын және орта бизнеске де қолдау ерекше. Сөзіміздің дәлелі өткен жылы ғана қайтарымсыз грант алып, кәсібін дөңгелетіп отырған қос орталық. Оның біріншісі – «Талшын Сатыбалды» массаж орталығы. Өткен жылы мемлекеттік бағдарламаны пайдаланып 1 миллион 225 мың теңге қаржы алған кәсіпкер өз қаражатын қоса отырып, 4 адамды жұмыспен қамтыған. Орталықта әйелдер мен балаларға медициналық және классикалық массаж түрлері жасалынады. Жас кәсіпкер шәкірттер де тәрбиелеумен айналысып жүргенін жасырмады. Екінші кәсіпкерлік нысан «Алтын босаға» наубайханасы. Шолаққорғандықтарды толықтай нан өнімдерімен қамтамасыз етуге қауқарлы бизнестің иесі Сәуле Аманбекова. Бұл жерде бүгінгі күні тәтті бәліштің 5 түрі, авторлық пәтірнан, сонымен қатар, тапсырыспен түрлі торттар пісіреді. Қос кәсіпкер де алдағы уақытта бизнесін кеңейтуді көздеп отыр.
Алдыңғы жылы жаңа ғимаратқа қоныс аударған Сұлтанбек Қожанов атындағы Созақ аудандық өлкетану музейі аудан мақтанышы. Ел Тәуелсіздігінің 30 жылдығына орай екі қабатты заманауи нысанға көшкен орталықтың тарихы терең. 1994 жылы ашылған музей қоры ауыз толтырып айтуға тұрарлық. Бүгінгі таңда 2 экспозициялық залда сырлы Созақтың тылсым тарихынан сыр шертетін жәдігерлер келушілердің көз қуанышына айналған. Ағымдағы жылдың 4 айында құны қымбат, тарихы жұмбақ музейге 1704 адам арнайы ат басын бұрса, орталықтың қоры 55 жаңа жәдігермен толыққан.
Созақ ауданында спортқа да ерекше көңіл бөлінеді. Алдыңғы жылға дейін дәстүрлі түрде өткізілген Халықаралық бокс турнирі сөзімізге дәлел. Биылғы Ұлы Отан соғысындағы жеңіске 78 жыл, Созақ ауданының 95 жылдық мерейтойларына арналған былғары қолғап шеберлерінің Халықаралық додасы карантиндік кезеңнен кейін жалғасын тапқан жағымды жаңалық. Көршілес Өзбекстан мен еліміздің бірнеше өңірінен арнайы келген 20 команда сапында 320-ға тарта жас спортшы сынға түсуде. Байрақты бәсекенің ашылу салтанатына арнайы қатысқан аудан әкімі Мұхит Тұрысбеков алдағы уақытта аудан орталығынан 200 орынды заманауи спорт кешенінің құрылысы басталатынын тілге тиек етіп, спорт сүйер қауымды қуантып қойды.
Аудандағы автомобиль жолдары да назардан тыс қалмаған. Жалпы Созақ ауданында 917 шақырым көлік жолдары бар. Оның ішінде 435 шақырым облыстық, 79-ы аудандық маңызы бар статусына ие болса, 403 шақырымы елді мекендердің ішкі жолдары болып табылады. Өткен жылы ұзындығы 34,1 километрді құрайтын 23 көшеге орташа жөндеу жұмыстары жүргізілсе, «Ауыл – ел бесігі» бағдарламасы аясында республикалық бюджеттен 30,5 шақырымды құрайтын 19 көшенің автомобиль жолы жаңаланған. Облыстық маңызы бар 152 шақырым жолға асфальт салу жұмыстары өткен жылы бастау алып, «КХ-2 Ұланбек-Созақ-Екпінді» жолындағы Шолаққорғаннан Ыбырай елді мекеніне дейінгі 83 шақырым, Созақтан Қарағұрға дейінгі 30 шақырым, Шолаққорған мен Құмкент аралығындағы 39 шақырым жерге асфальт жабындысын төсеу жұмыстары қарқынды жүргізілуде. Бұл нысандардағы жұмыстар 2024 жылы да жалғасын таппақ.
Сырлы Созақтағы шаруалар да заман ағымынан қалыс қалмаған. Мәселен, «Қанжарбек» шаруа қожалығы мемлекет қолдауын тиімді пайдаланып, осыдан екі жыл бұрын «Ауыл шаруашылығын қаржылай қолдау қоры» АҚ арқылы 10 миллион теңге несие алған. Бұл қаржыға қожалық төрайымы Айгүл Ашетова 400 бас қой сатып алыпты. Бүгінгі таңда шаруасын өрге дөңгелеткен қожалықта 1130 бас уақ мал, 50 бас мүйізді ірі қара мен 75 бас жылқы бар. Сонымен қатар, бұл жерде 8 адам тұрақты жұмыс тауып, орта есеппен 120-150 мың теңге мөлшерінде жалақы алып отыр. Заман талабына сай жұмыс жүргізіп отырған тағы бір қожалық «Дәмен» шаруа қожалығы. Шаруа қожалығы ағымдағы жылы құны 52 миллион теңге тұратын жобаны іске асырып, 40 гектарға жуық аумақ жаңбырлатып суғару әдісіне көші жоспарланған. Бұл технологияның артықшылықтарын әбден зерделеген аудан шаруалары заман талабына сай жұмыстарын күшейте түсуді көздеп отыр.
Жалпы, Созақ өңіріндегі оң өзгерістер көңіл қуантады. Елдің әлеуеті ай сайын артып, күн санап көтеріліп келеді. Аудан басшылары жүйелі жұмыстарын тоқтатпай, халықтың қалауын орындауға ниетті.
Осыған дейін Түркістан облысы, Бәйдібек ауданында газдандыру жұмыстары қарқынды жүргізіліп бастаған-ды. Қазіргі таңда аудан аумағындағы 17 елді мекен табиғи газды тұтынуда. Қалған елді мекендерді табиғи газға қосу жұмыстары жоспарға сәйкес кезең кезеңімен атқарылуда.
Өткен жылы Амансай, Түйетас, Талап, Сарыбұлақ, Жолғабас елді мекендерін табиғи газбен қамтамасыз ету бойынша құрылыс жұмыстары басталған. Нысан толық аяқталған соң 5 елді мекен тұрғындары табиғи газдың игілігін көретін болады. Сонымен қатар 2023 жылы аудандағы Жоғарғы Боралдай, Тайманов, Теректі, Жиенқұм, Шақпақ, Қазата, Ағыбет, Алғабас, Кеңестөбе, Бәйдібек ата елді мекендері және Шаян елді мекеніндегі 20 коммуналдық (жалдық) тұрғын үй мен 55 гектар инженерлік-коммуникациялық инфрақұрылымында салынатын тұрғын үйлерді табиғи газбен қамтамасыз ету бойынша тиісті қаржысы бөлініп, құрылыс жұмыстары басталады. Сондай-ақ аудандағы 10 ауылдың (Жаңаталап, Таңатар, Қошқар ата, Тұрақты, Жұлдыз, Қаратас, Ақжар, Кеңсай, Жарықбас, Алмалы) газ құбырларының құрылыстарына жобалық-сметалық құжаттамалары әзірлену үстінде. Жалпы 2023 жылы Бәйдібек ауданындағы халықтың 82 пайызын газбен қамту жоспарлануда.
Жуықта ғана Түркістанда 70 газ нысанының құрылысы аяқталған болатын. Биыл 2023 жылдың қаңтар айынан бастап 833 елді мекеннің 465-і табиғи газбен қамтылды. Атаулы мәселеге қатысты Түркістан облысында құрылысы жүргізіліп, бірақ іске қосылмай тұрған газ құбырлары мен газ таратушы станцияларын жөндеп, іске қосу, елді мекендерді «көгілдір отынмен» қамту мәселесі талқыланған мәжіліс өтті. Облыс әкімі Дархан Сатыбалды салаға жауапты мекеме басшылары мен аудан, қала әкімдеріне осы бағыттағы жұмыстарды жандандыруды тапсырды. Жұмысты сапасыз орындаған мердігерлердің мәселесін заң аясында қарау керектігін атап өтті. Жауапты басқармаларға осы саладағы қаржыны дұрыс жоспарлау, жобаларды қаржыландыруды жүйелеуді жүктеді. Аудан, қалаларда халықпен кездесулерде ел инфрақұрылым, соның ішінде газ мәселесін жиі қозғайды. Кейбір жобалар қаржы бөлінсе де, сапасыз орындалған немесе соңына дейін жүзеге аспаған. Мәселені жасыру емес, шешу жолдарын қарастыру керек. Егер газ жүргізуге жауапты мердігер жұмысын келісімшартқа сәйкес атқармаса, заң органдарына ұсынылсын. Бұл түйткілді өзім тікелей бақылауыма аламын. Жұмыс уақтылы атқарылмаған соң қаржыландыру да қиынға соғады. Ондай мысалдар бар. Аймақты газдандыру мәселесін тұрақты бақылауда ұстап, жоспарға сай жұмыс жүргізген жөн. Газ кіргізу жұмыстарын мейілінше жылдамдату қажет. Әйтпесе, алдағы жылыту маусымына үлгермей қалуы мүмкін. Газды үйлерге кіргізу, құжаттарын реттеу да уақытты алады. Биыл жоспарланған жұмыстар жедел атқарылып, елді мекендерге газ берілсін. Жауапты басқарма, аудан, қала әкімдері жұмысты ширатыңыздар. Инфрақұрылым бойынша әрбір жобаны қатаң қадағалап, соңына дейін жеткізу қажет, – деді Дархан Сатыбалды.
Түркістан облысының энергетика және тұрғын үй-коммуналдық шаруашылық басқармасының басшысы Сәкен Далиевтің айтуынша, облыс табиғи газды 2018 жылға дейін «Газли-Шымкент» магистралды газ құбырынан тұтынған. 2018 жылдан бастап отандық «Бейнеу-Бозой-Шымкент» магистралды газ құбырынан газ алуда.2023 жылдың 1 қаңтардағы жағдай бойынша 833 елді мекеннің 465-і табиғи газбен қамтылған, пайыздық көрсеткіші 55,8. Яғни, 1 млн. 538 мың тұрғын немесе тұрғындардың 76,8 пайызы табиғи газды қосу мүмкіндігіне қол жеткізген.
Өңірде 2023 жылы 101 нысанның құрылысына 17,6 млрд теңге бөлініп, оның ішінде 70 нысанның құрылысы биыл аяқталады. Қалған 31 нысан 2024 жылға өтпелі. Қалған қолдау таппаған нысандар 2024-2026 жылдарға республикалық бюджетті қалыптастыруға ұсынылған.
Мәжілісте Ордабасы, Мақтаарал, Жетісай, Сарыағаш, Келес, Сайрам аудандарындағы газ саласы бойынша өзекті мәселелері талқыланды. Оның 2018-2021 жылдары аралығында құрылысы аяқталып, газға қосылмаған нысандардың мәселелері де қаралды. «ҚазТрансГаз Аймақ» АҚ өңірлік филиалы басшылығының деректері де тыңдалды.
Әрбір мәселе назарға алынып, тиісті жұмыс жүргізіледі. Жұмыстар нәтижесінде бір жылда облыстағы елді мекендердің газбен қамтылу көрсеткішін 62,7 %-ға, яғни, 465-тен 521-ге жеткізу жоспарланып отыр.
