Ел Үкіметі мал шаруашылығын дамытудың 2024-2026 жылдарға арналған жол картасын әзірлеген болатын. Ол бойынша жаңа экспорттық нарықтар ашылып, ет өндірісінің өзіндік құны төмендетілуі тиіс.
Мал шаруашылығындағы стратегиялық маңызы бар сала – ветеринария. Осы орайда, Ауыл шаруашылығы вице-министрі Аманғали Бердалин өз пікірін білдірді.
Қазір ел аумағында мал соятын 904 нысан бар, оның ішінде 109-ы – ет өңдеу кәсіпорны, 281-і – мал сою пункті және 514-і – мал сою алаңы. Ветеринариялық талаптарға сәйкес келмегендіктен, 106 мал сою нысаны жабылған.
– Бұдан былай барлық төрт түліктің есебі, мәліметтер толық цифрландырылады. Әрбір төрт түліктің дерегі базада тіркеліп, оның қозғалысы бақыланып, қайда сатылды, қай өңірге айырбас жасалды түгел – көз алдымызда тұратын болады. Екінші айналысып жатқан жұмысымыз – мал өнімдерінің қауіпсіздігі. Яғни, ендігі уақытта оның еті де, сүті де ветеринариялық зертханалардан өткеннен кейін барып, тұтынуға жіберіледі. Бұрын ветеринар-дәрігер сатылатын малға тек бір жапырақ қағаз жазып бере салатын. Енді олай болмайды, барлығы сандық форматқа көшіріледі, – деді ол.
Бұл ретте, Павлодар облысының Шарбақты ауданында қанатқақты жобасы тәжірибеден өткізілді. Барлық ірі ауылдық округтерде мал соятын орындарда ветеринарлық-санитарлық сараптама зертхана қойылады. Сойылар алдында сол зертханадан тексерістен өтеді. Сатып алушы базарға келген ет немесе төрт түлік туралы QR-код арқылы ақпарат алатын болады. Ол қандай мал, қай шаруашылықтан келді, қашан егілді, қай уақытта сойылды, қай ветеринарлық зертханадан тексерілді, т.б. мәліметтерді көре алады.
Тағы бір жаңалық, ауылдық жерге барып, жұмыс істеймін дейтін мал дәрігерлеріне 9 млн теңге көлемінде қайтарымсыз қаражат берілетін болады. Былтырдан бері ветеринарлардың айлық жалақысына 25% қосылды, одан бөлек биологиялық қауіпсіздікке байланысты 30-50% және қосылды. Еңбек демалысына шыққан кезде 2 айлық жәрдемақы қарастырылады. Бұрын жастар ауылда вет-дәрігер болудан қашатын болса, қазір ол тоқтады. Яғни, көзқарас өзгеріп келеді. Қазір ауылдағы ветеринар маман шамамен 320 мың теңге көлемінде жалақы алады. Осының барлығы – салада маман тұрақтандыруы үшін жасалып жатқан шаралар.
