Жасанды зерде – ақпараттану саласының адам зердесін қажет ететін есептерді орындауға (шешуге) арналған саласы, яғни адамның ойлау, зерделеу қабілетін компьютерлік жүйелерге енгізу арқылы күрделі зерделеу есептерін шешуге жол ашады.
Бұл орайда, Жасанды интеллект және роботтехника зертханасының меңгерушісі, Қазақстан Республикасы Ұлттық инженерлік академиясының академигі, техника ғылымының докторы, профессор Еділхан Әмірғалиев «Ана тілі» басылымына берген сұхбатында тарқата айтқан.
Мысалы, табиғи тілдегі мәтіндерді және сөйлемдерді, кескіндерді тани отырып әртүрлі диагностикалық есептерді шешу, үдерістерді автоматты жоспарлау, машиналық оқыту тағы сол сияқты бағыттарды қамтиды. Жасанды зерденің негізгі мақсаты – ағымдағы жаңа шарттарға бейімделіп алдыңғы кезеңдерде алынған нәтижелерді зерделей отырып, жекеленген есептерді дербес шешуге мүмкіндігі бар технологиялар жасау.
Жасанды зерде жеке ғылым саласы ретінде даму жолында мына бағыттарды қамтиды.
Машиналық оқыту және терең оқыту – осы бағыттағы жүйелер жасанды зерденің алгоритмдік негіздерін құрады, деректер қорын оқу негізінде алгоритмдердің нәтижелігін, жүйелердің дәлдігі мен өнімділігін арттырады.
Когнитивтік жүйелер – табиғи тілді түсіну, сөйлеу сияқты адамның ойлау қабілетін бейнелейтін жүйелер құруға негізделеді.
Роботтар – жасанды зерденің роботтарға енгізілуі олардың мүмкіндігін күнделікті тұрмыстағы мәселелерді шешуден өндіріс жағдайында дербес жұмыс істей алатын жүйелерге дейін арттырады.
Әрине, бұл жағдайларда этикалық мәселелер және қауіпсіздік мәселелері ескерілуі қажет.
– Әрине, жасанды зерде алгоритмдік, техникалық және бағдарламалық жасақма жағынан дами отырып, қазір өмірдің көптеген саласына енгізіліп жатыр. Сол салада жаңа білім алуға әсер етіп отыр. Бұрын тек қана адамның қатысуымен іске асатын жұмыстарды жасанды зерделі жүйелер, роботтар атқарып отыр, олар шаршамайды және қателеспейді, – дейді ғалым.
