Шымкенттік жас «Ең үздік қолөнерші» номинациясын иеленді

Тағдырдың сынына төзе білген, қайсарлық танытып, өмірде жетістікке жеткен тұлғалар аз емес. Осындай талапты жастың бірі – Мақсат Сәрсембаев.
Мақсат Құрманғазыұлы 1988 жылы Түркістан қаласында дүниеге келген. Бала күнінен спортқа әуес болған ол, он екі жасынан «Каратэ до» спортына қатыса бастайды.
Кейін мектепті бітірген соң, Алматы индустриалды-инновациалық академиясына «Интерьер дизайні» мамандығына оқуға түседі. 2007 — 2008 жылдары әскерге шақырылып, Павлодар қаласындағы №5512 бөлімде азаматтық борышын абыроймен өтеп қайтады. Әскерден соң, елордаға қызметке орналасады.
2009 жылдың шілде айында ата-ана үмітін үкілеген бозбала кездейсоқ сәтсіздікке ұшырайды. Достарымен бірге Бурабай көліне демалуға барғанда суға секіріп, жұлынынан ауыр жарақат алады. Медициналық зерттеулердің қорытындысы бойынша, оның мойын омыртқасына зақым келгені анықталады. Ауыр жарақаттың кесірінен аяқ-қолдары қимылсыз қалады. Бір жарым жыл қимылсыз төсек тартып жатып қалады. Бірақ жігерлі жас ауырытпалыққа мойынсүнбай, өзін қолға алып, 0,5 кг салмақты гантельмен жаттығу жасай бастайды. Ұзақ жаттығулардың нәтижесінде қолдары икемделіп қимылдағанын көргенде сұлық жатқан кеудеге үміт оты ұялайды.
2012 жылы ол Ресейдің Новосібір қаласының арнайы клиникасынан кешенді ем алып келді. Сол сапардан бойына күш-жігер жинап, асқақ армандармен тек алға ұмтылуға мақсат қояды. Ата — ананың, бауырларының, достарының демеуі мен көмегінің арқасында өмірге деген құлшынысы оянып, қоғамға белсене араласа бастайды.
Мақсат ата кәсібін жалғастырып, ағаштан ою ойып, сандық, есік- терезе, үй жиһаздарын жасайтын шағын цех ашып, іске қосады. Оның бисер моншақтарынан, ағаштан жасаған бұйымдары, былғары картиналары көрмелерге қойылып, көпшіліктің көңілінен шықты.
Қолөнерші жастар арасындағы сайыста «Ең үздік қолөнерші» номинациясын иеленді. 2016 жылы Астана қаласында өткен Республикалық қолөнершілер көрмесінде 2-орынды жеңіп алды.
2016 жылдың қараша айында Рио паралимпиадасының чемпионы Зулфия Ғабидулинамен кездесіп, мотивациясының арқасында жүзу спортына баруға шешім қабылдайды. Бүгінде спортта біраз жетістіктерге жетті.
Атап айтар болсақ, 2017 жылы Атырау қаласында өткен ҚР 5 — Спартакиадасының чемпионы, 2018 жылы Тараз қаласында өткен ҚР чемпионатының жүлдегері, 2019 жылы Ақтөбе қаласында өткен 5 паралимпиада чемпионы. 2019 жылы спорт шеберлігіне үміткер атағын алды.
Мақсат Құрманғазыұлы қоғамдық қызметтерде де белсенділік танытып келеді. 2017 жылдан бері мүгедектігі бар азаматтардың өзекті мәселелерін шешу мақсатында «Шектелме мүгедектер қоғамы» қоғамдық бірлестігінің төрағасы қызметін атқарады.
2018 жылы шілде айында Ақерке атты арумен отбасын құрды. 2019 жылдың тамыз айынан Шымкент қаласы әкімдігінің «Шапағат» арнайы қызмет көрсету орталығында Еңбек терапиясы бөлімінің инспекторы қызметін атқарады. Тәуелсіздік мерекесіне орай «Ерен еңбегі үшін» медалімен марапатталды.