Қасым-Жомарт Тоқаев 2023 жылғы 1 қыркүйектегі Жолдауында стратегиялық маңызы бар міндеттің бірі – көлік-логистика саласының әлеуетін толық пайдалану деп айтты.
– Қазір әлемде жаңа экономикалық кеңістік қалыптасып жатыр. Қытайдан Еуропаға, Ресейге, Орталық Азияға және осы аймақтардан Қытайға жіберілетін тауар көлемі айтарлықтай көбейеді деген болжам бар, – деді Президент.
Қазақстан солтүстік пен оңтүстікті, батыс пен шығысты байланыстыратын жаһандық жолайрықта орналасқан. Бұл біздің елімізге зор мүмкіндік беріп отыр. Сондықтан көлік-логистика саласы экономикамызды алға бастайтын басты күштің біріне айналуға тиіс. Қазір бәсеке күшейіп тұр. Осыған орай бірқатар маңызды мәселені шұғыл шешу керек.
Осы орайда, өткен жылдың қараша айында Президент Қасым-Жомарт Тоқаевтың төрағалығымен Қазақстан Республикасы Қауіпсіздік кеңесінің отырысы өткен болатын. Жиында еліміздің көлік-логистика әлеуетін жүзеге асыру барысында кездесетін стратегиялық сын-қатерлер қарастырылды.
Мемлекеттік органдар мен ұлттық компаниялардың басшылары теміржол, автомобиль, теңіз, әуе көліктері, сондай-ақ құбыр арқылы тасымалдау бағыттарында жиі ұшырасатын проблемаларды шешу үшін атқарылып жатқан жұмыстар жөнінде баяндама жасады.
Мемлекет басшысы транзиттік жүк тасымалын, соның ішінде Транскаспий халықаралық көлік бағдары арқылы тасымалдау ісін дамытудың өзектілігіне назар аударды. Сондай-ақ, отандық өнімдерді экспорттау үшін транспорт әлеуетін ұлғайту маңызды екенін атап өтті. Ол үшін инфрақұрылымдық шектеулер мен басқа да кедергілерді жойып, көлік-логистика қызметінің сапасын арттыру және тариф қалыптастыру жүйесін жетілдіру қажет. Осы жиын барысында өнеркәсіп, экспорт және транзит әлеуетін қатар дамыту, инфрақұрылым құрылысының заманауи стандарттарын енгізу және көлік-логистика саласының экономикаға мультипликативті әсерін қамтамасыз ету мәселелеріне айрықша мән берілді.
Осы ретте, Түркістан қаласындағы «Hazret Sultan» халықаралық әуежайында әуе бағыттарының саны ұлғаюда. Бүгін 16 қаңтар Түркістан халықаралық әуежайына Әбу-Дәбиден «Wizz Air» әуекомпаниясының Airbus 321 ұшағы келіп қонды. Біріккен Араб Әмірліктерінің танымал туристік қаласынан бағыт алған ұшақта 100 жолаушы 7 экипаж мүшесі бар. Жолаушылардың 40%-ы — туристер. Ал, дәл осы күні рухани астана Түркістаннан Әбу-Дәбиге 200 адам ұшады.
Еске салсақ, 2023 жылдың қараша айынан бастап «Abu-Dhabi — Turkistan» жаңа әуе бағытының ашылатыны және билеттер сатылымға шыққаны жарияланған еді. Бағасы өте қолжетімді билеттер wizzair.com сайты мен мобильді қосымшасында 19 мың теңгеден, яғни БАӘ-нің 159 дирхамынан басталады. Қос қала арасында саяхат жасауды жоспарлағандар үшін билеттерді алдын ала сатып алуды ұсынамыз. Егер көрсетілген сайтқа тіркеліп, клуб мүшесі атанған жағдайда 10%-ға дейінгі жеңілдіктерді алуға мүмкіндік бар. Рейстер аптаның сейсенбі, бейсенбі және сенбі күндері 3 рет орындалады. Жалпы Түркістан халықаралық әуежайы арқылы Стамбул және Эль-Кувейтке халықаралық, Қазақстан ішінде Астана, Алматы, Қарағанды, Орал, Ақтөбе және Ақтау қалаларына республикалық рейстер тұрақты ұшады.
Түркістан қаласында халықаралық әуежай салу, пайдалану және басқару” мемлекеттік-жекешелік әріптестігі келісімшартына сәйкес, постинвестициялық кезең 2024 жылдың 1 наурызында аяқталады. Түркістан әуежайын ары қарай дамыту мақсатында облыстық әкімдік тарапынан түрлі ұсыныстар қарастырылып жатыр. Осыған орай, Түркістан облысы әкімінің бірінші орынбасары Зұлпыхар Жолдасов Вьетнам елінің ірі инвесторларының бірі “Sovico Group” компаниясының басшысы Фам Нгок Сау мен орынбасары Ле Мин Туанмен кездесті.Кездесу барысында әуежайды заман талабына сай жан-жақты дамытуға бағытталған ұсыныстар айтылып, өңірдің туризм саласын өркендетуге байланысты идеялар талқыланды. Қос тарап әріптестікті нығайта түсуге уағдаласты.Түркістанның туристік әлеуетін арттырып, өңірдің әлеуметтік-экономикасына оң әсерін тигізетін ұсыныстар мен бастамаларды, инвестициялық жобаларды талқылау жұмыстары алдағы уақытта да жалғасады.
Айта кетсек, Түркістандағы «Түркістан халықаралық әуежайы» Халықаралық азаматтық авиация ұйымының 1-ші санатына сәйкес келеді. Әуежайдың жалпы ауданы – 905 га, әуе айлағының өткізу қабілеті сағатына – 450 жолаушы немесе жылына – 3 млн. жолаушы. Қазіргі уақытта «Түркістан халықаралық әуежайы» 2 халықаралық (Ыстамбұл, Эль-Кувейт) және 6 республикаішілік рейстерге (Астана, Алматы, Ақтау, Қарағанды, Ақтөбе, Орал) қызмет көрсетеді. Аталған рейстерді «Turkish Airlines», «Jazeera Airways», «Fly Arystan», «Scat», «Qazaq Air» және «Южное небо» авиакомпаниялары орындайды. 2024 жылдың қаңтарында «Түркістан – Абу-Даби» әуе рейсінің ашылуы жоспарланды. Сондай-ақ отандық және шетелдік авиакомпаниялармен 3 халықаралық (Анталья, Тбилиси, Самарқанд) және 3 республикаішілік (Көкшетау, Қостанай және Үшарал) авиарейстер ашу бойынша келіссөздер жүргізілуде. Түркістан әуежайының жүк тасымалдау динамикасын арттыру мақсатында отандық «Alpha Sky», түріктің «MNG», «Turkish Cargo», әзірбайжандық «Silkway Airlines-Cargo» авиакомпанияларымен жүк тасымалдарын дамыту бойынша келіссөздер жүргізілуде.
