Мемлекет басшысы Қасым-Жомарт Тоқаев өз Жолдауында инфрақұрылымның әбден тозуы халықтың тұрмыс сапасына тікелей әсер ететінін, индустрияландыру қарқынын да тежейтінін айтты.
Осы орайда, Түркістан облысында ағын сумен қатар табиғи газбен, ауыз сумен қамтамасыз ету мәселелері де өзекті. Ауыз сумен қамтамасыз ету мәселесі бойынша «Қуатты өңірлер – ел дамуының драйвері» ұлттық жобасы аясында 2025 жылдың қорытындысымен халықты 100 пайыз ауыз сумен қамтамасыз ету жоспарланған. Бүгінгі таңда облыстың 833 елді мекенінің 720-сы немесе 86,4% ауыз сумен қамтамасыз етілген. Республикалық бюджеттің 2024-2026 жылдарға арналған жобасында облыстың сумен жабдықтау және су бұру жөніндегі 31 жобасын іске асыруға 25,4 млрд теңге бөлу көзделген.
Мысалы, 59 мыңға жуық халқы бар Қарабұлақ ауыл округі тұрғындарының 60 пайызы ғана ауыз су құбырларын пайдалана алады. Бұл құбырлардың өзі 1968 жылы тартылған, яғни бүгінде тозығы жеткен, тәулік бойы су беруге жарамсыз. Ауыл халқының 30-35 пайызы құдық және өздігімен қазып алған су ұңғымаларын пайдаланып жатыр. Аудан әкімдігі тарапынан жағдайды жақсарту бойынша жерасты су қорына талдау жүргізіліп, оң қорытынды алынған. Жалпы құны 9,4 млрд теңгені құрайтын жоба-сметалық құжаттары әзірленген, мемлекеттік сараптаманың оң қорытындысы бар.
Облыс тұрғындарының 80 пайызы ауылды жерлерде тұрады. Яғни ауылдарды қажетті инфрақұрылыммен қамту – басты бағыттардың бірі. Өңірде бір жылда мүлдем ауыз суы жоқ 10 елді мекендегі 9 мың тұрғын ауыз сумен қамтылды. Сондай-ақ 10 елді мекендегі тозығы жеткен ауыз су құбырлары жаңартылды. Облыс әкімдігінің мәліметінше, өткен жылы 16 елді мекенде су жүйелері жүргізіліп, ауыз су берілді. Елді мекендерді үздіксіз және сапалы ауыз сумен қамту үшін жерасты су кен орындарын, су көздеріне іздеу-барлау жұмыстарын жүргізіп жатқан уәкілетті органдар тарапынан су қорлары бекітіліп жатыр.
