Қазақстан – цифрландыру саласының ішінде электронды үкіметті дамыту жағында жақсы көрсеткіштерге қол жеткізген мемлекет. Атап айтар болсақ, екі жыл бұрын біздің ел Электрондық үкіметті дамыту рейтингіне енгізілген 193 елдің арасында 28-орынға табан тіреп, «аймақтық көшбасшылардың» қатарынан көрінді. Бұл тізімге тұтас ТМД бойынша қазақ елі ғана енгендігін айта кеткен жөн.
Еңбек және халықты әлеуметтік қорғау министрі саланы дамытудың 2023-2027 жылдарға арналған жоспарын таныстырып, ауқымды жоспар маңызды бес бағыттан тұратынын айтқан. Соның бірінші бағыты – цифрландыруды тереңдету болатын. Яғни, әлеуметтік қызметтерді көрсетудің өтініш нысанынан оларды ұсынудың анықтау және проактивті форматына көшуді қамтамасыз етуге тиіс.
«2023 жылы бағытты іске асырудың түпкілікті нәтижесі проактивті қызметтердің үлесін олардың жалпы санының 60%-на дейін жеткізу болады. Ол үшін қазақстандық отбасылардың мемлекеттік кепілдіктер туралы дерекқоры жасақталып, мемлекеттік органдардың ақпараттық жүйелерінен мәліметтерді жинақталмақ. БҰҰ Даму бағдарламасы ұсынған Алькире-Фостер моделін пайдалана отырып, отбасылардың әлеуметтік әл-ауқатын бағалау 6 миллионнан астам отбасының мәртебесін және олардың мемлекеттік қолдаудың қандай да бір түрлеріне қажеттілігін анықтауға мүмкіндік берді. Тиісінше, мемлекеттік органдар мен жергілікті әкімдер кімге, қашан, қандай көмек көрсету керектігін нақты анықтап қана қоймай, әлеуметтік тәуекелдердің алдын алу бойынша шаралар қабылдауға мүмкіндігі бар», – деген еді министр өз сөзінде.
Мемлекет басшысы Қасым-Жомарт Тоқаев елдің цифрлық трансформациясындағы бес негізгі басымдықты атап өткен еді.
Соның біріншісі – азаматтарға заманауи қызмет көрсету. Яғни мемлекеттік қызметтердің барлығы мүмкіндігінше электронды форматқа көшірілуі керек. Екінші басымдық – IT саласын дамытуға қолайлы жағдай жасау. IT сектор мемлекеттік қызметтің маңызды бағыты болғандықтан, цифрлық технологиялар, криптоиндустрия, цифрлық майнинг саласында жетекші ойыншы болуға ұмтылу аса маңызды. Үшінші басымдық – IT инфрақұрылымын ауқымды жаңғырту. Бұл арқылы еліміз халықаралық деңгейде трансшекаралық деректер ағынымен ұштасқан цифрлық инфрақұрылымды қалыптастырады. Төртінші басымдық – цифрлық экономика мен индустрияны дамыту. Бұл бағыт технологиялық жаңарту және цифрлық шешімдер қабылдау үшін инновациялық гранттар мен салықтық жеңілдіктер ұсынуды көздейді. Бесінші басымдық – адами капиталды нығайту.
Көріп жүргеніміздей, цифрлық трансформация заманында IT мамандарға деген қажеттілік артып келеді. 2025 жылға қарай кем дегенде 100 мың қызметкерді даярлау міндеті де қойылған.
