Ұлттық статистика бюросы «Demo day» іс-шарасын өткізіп, цифрлық трансформацияның нәтижелерін таныстырған болатын.
Бюро жоспарлаған Цифрлық трансформация портфелі 71 жобадан тұрады. Бұл межелі міндеттің 23-і өткен жылы орындалса, басқа жобалар 2026 жылға дейін толық іске асады.
Ұлттық статистика бюросының мәліметінше, статистикалық тіркелімдер мейлінше егжей-тегжей статистика жасауға мүмкіндік береді. Осылайша, мемлекеттік органдардың 150 дерек базасына және 3 мыңнан аса анықтамалық пен классификаторлардың құрылымдарына талдау жасалып, Smart Data Ukimet арқылы интеграциялау жұмыстарын жүргізілді.
Ұлттық статистика бюросының сайтында елдегі инфляция деңгейінен бастап, басқа да мәліметтерді оңай білуге болады. Тағы бір ақпар, осы деректердің барлығын республикалық маңызы бар қала, облыс орталықтарында, 85 елді мекенде статистика мамандары жинайды. Енді статистика бюросы инфляцияны есептеу үшін деректерді жинаудың жаңа әдістерін енгізіп отыр. Жаңа қосымша арқылы статистика мамандарына сол бағаларды анықтап, есептеу жеңілірек болады.
Бұл туралы Бюроның баға статистикасы департаментінің директоры Қуанышбек Жақыпбекұлы хабарлады.
– Бүгінге дейін біз инфляцияны есептеу барысында бағаларды қағаз түрінде жинайтынбыз. Яғни біздің мамандар дүкен, базарларға барып, бағаларды қағаз жүзінде тіркейтін. Содан біз халықаралық тәжірибені ескере келе, мобильді қосымшаны құруға шешім қабылдадық. Бүгінде статистика мамандарына арналған мобильді қосымша онлайн, офлайн режімде жұмыс істейді. Олар дүкен, базарларды аралағанда штрих-кодты сканерлеу арқылы бағаны онлайн тіркейді. Осылайша, біздің баға жинаушы мамандардың жұмысы біршама жеңілдеді, – дейді ол.
Сарапшылардың болжамы бойынша, он жылдан кейін әлемдегі өнімдер мен қызметтердің 70 пайызы цифрлық платформалық модельдерге негізделеді. Осындай жағдайда Қазақстан өз алдына еуразиялық кеңістіктегі ең ірі цифрлық хабтардың біріне айналу стратегиялық міндетін қойған болатын.
