Цифрландыру – бұл сандық ақпараттық-коммуникациялық технологияларды пайдалануға негізделген экономикалық, әлеуметтік және мәдени қатынастар жүйесі.
Сарапшылардың болжамы бойынша, он жылдан кейін әлемдегі өнімдер мен қызметтердің 70 пайызы цифрлық платформалық модельдерге негізделеді. Осындай жағдайда Қазақстан өз алдына еуразиялық кеңістіктегі ең ірі цифрлық хабтардың біріне айналу стратегиялық міндетін қойған болатын. Бұл үшін берік негіз бар.
Былтыр жыл басында «Қазақстан Республикасындағы цифрлық активтер туралы» Заңы мен ілеспе құжаттар да қаралып, сенаторлар қаралған заңдарды концептуалды түрде қолдайтындарын білдірді. Алайда, оларды қарау барысында депутаттар жекелеген баптарға бірқатар өзгеріс енгізді. Заңдарды сенаторлардың ұсыныстарымен Мәжіліске қайтару туралы шешім қабылданды.
Заңның міндеттері:
– жаңа терминологияны енгізу (цифрлық актив, цифрлық активтер биржасы, цифрлық майнинг, цифрлық майнинг деректерін өңдеу орталығы);
– цифрлық майнерлер қызметін лицензиялау;
– цифрлық майнингтік пулдар қызметін жүзеге асыру;
– салық салу мақсатында цифрлық майнерлер мен цифрлық майнингтік пулдардың кірістері туралы мәліметтерді ұсыну;
– цифрлық активтер биржаларының қызметін регламенттеу;
– цифрлық активтер саласындағы мемлекеттік бақылау;
– Қазақстан Республикасының цифрлық активтер саласындағы заңнамасын бұзғаны үшін жауаптылық.
«Қолжетімді интернет»
Одан бөлек, өткен жылы елімізде «Қолжетімді интернет» ұлттық жобасы әзірленіп жатқан болатын. Бұл туралы ҚР Цифрлық даму, инновациялар және аэроғарыш өнеркәсібі министрі айтып, жобаның мақсаты – халық пен бизнесті 100 Мбит/секундтан кем болмайтын жылдамдығы жоғары интернетпен қамтамасыз ету екендігін жеткізген. Ұлттық жобаның басты іс-шараларының бірі – 3 мың елді мекенге дейін оптика талшығын жүргізу. Яғни, қазір мектептер, ауруханалар мен әкімдіктер сияқты әкімшілік ғимараттар туралы ғана емес, ең алдымен нақты үйлерді жоғары жылдамдықты интернетке қосу жұмыстары жүргізіліп жатыр.
