Әлемдік сарапшылар арасында цифрлы технологиялардың өскелең ұрпаққа тигізетін ықпалы мен жасанды интеллектінің келешегі туралы біржақты көзқарас жоқ.
Кейбір сарапшылар заманауи инновациялық технологияның қарыштап дамуын жарқын келешектің бір көрінісі ретінде қарап, қолдау білдірсе, кейбірі жастардың санасына тигізетін жағымсыз ықпалын алға тартып, мүлдем қарсы шығады.
Қазір цифрлы кеңістікте жастар ерекше белсенділік танытып отыр. Кейінгі жылдары Қазақстанда жастар арасында интернет қолданушылар саны артып, әлеуметтік желілер мен түрлі онлайн-платформаларда белсенділік аясы кеңейді.
TNS деректеріне сәйкес 2020 жылдан бастап елімізде әлеуметтік желіні пайдаланушылар саны күрт өскен. 2021 жылдың қаңтарында жалпы саны 12 млн адамға жетіп, 2020 жылдың басымен салыстырғанда 26%-ға (2,5 млн адамға) артты. 2020 жылы әлеуметтік желілер өздерін кез келген аудиториямен байланыстың негізгі арнасы ретінде танытты. Оған бір жағынан әлемде орын алған постпандемиялық кезең де өзінің белгілі бір деңгейде ықпалын тигізгенін айтпасқа болмайды. Жалпы, Қазақстанда 2021 жылы статистикалық деректерге сәйкес әлеуметтік желіні қолданушылардың үлес салмағы 63,5% -ға дейін жетті.
Кейінгі жылдары интернет кеңістігінде, әлеуметтік желілерде еліміздің күнделікті өзекті саяси мәселелерін талқылауда жастардың азаматтық-саяси белсенділігі артып келе жатыр. Интернет кеңістігінде азаматтардың кері байланысы маңызды саяси мәселелерді шешуде билік пен қоғам арасындағы өзара әрекеттесудің жаңа формаларын қалыптастыруға жол ашады деген үміт бар.
Сонымен қатар, билік пен халық арасындағы заманауи коммуникациялық өзара іс-қимылда цифрлық технологиялардың рөлі басымдық танытып отырғанын көруге болады.
