Мемлекет басшысы Қасым-Жомарт Тоқаев ақпан айында Үкіметтің кеңейтілген отырысында жасанды интеллектіні дамытуға баса назар аудару қажеттігін айтқан болатын.
“Экономиканы цифрландыру ісін жалғастыру және жасанды интеллект технологиясын кеңінен қолдану аса маңызды. Біз мемлекеттік және қаржы қызметтерін цифрландыру ісінде айтарлықтай табысқа қол жеткіздік. Мәселен, 2023 жылдың қорытындысы бойынша қолма-қол ақшасыз төлем үлесі 88 пайызға жетті. 2020 жылға дейін бұл көрсеткіш 50 пайыздан аспаған еді. Небәрі төрт жылдың ішінде Қазақстанда қаржы технологиясы қарқынды дамыды. Бұл жетістік экономиканың басқа салаларына да үлгі болуға тиіс. Оларды да цифрландыру ісін қолға алатын кез келді”, – деді Президент.
Рас, кейінгі жылдары еліміз цифрлық даму саласына ерекше көңіл бөліп келеді. Жалпы, бұл үрдіс бізде ғана емес, бүкіл әлемде байқалады. Оның бірден-бір себебі – пандемия. Карантин уақытында барлық елде электронды үкіметтің жұмысы жандана түсті.
2018-2022 жылдар аралығында электрондық үкіметтің дамуында, әсіресе пандемияға дейінгі және бүгінгі кезеңдегі деректерді салыстырып қарасақ едәуір өзгерістер бар. Сovid-19 пандемиясы кезінде әсіресе, денсаулық сақтау, білім беру, әлеуметтік қорғау салаларындағы қызметтер біршама оңтайландырылды. Содан бері мемлекеттік секторда цифрлық технологияларды жан-жақты жетілдіру үдерісі әлі де жалғасып келеді.
БҰҰ-ның электрондық үкімет сауалнамасына сәйкес, 2022 жылы электрондық үкімет саласындағы көшбасшылардың ондығына Дания, Финляндия, Корея Республикасы, Жаңа Зеландия, Исландия, Швеция, Аустралия, Эстония, Нидерланд, АҚШ мемлекеттері кірген. Орталық және Оңтүстік Азия елдері арасында да осы мақсаттарға инвестиция салатын аймақ аумағындағы көшбасшы мемлекеттер бар. Оның бірі – Қазақстан. Еліміз 28-орында.
Рейтингті анықтауда мемлекеттердің «цифрлық дамуға» қол жеткізудің нақты жоспары, міндеттемесі, қолжетімділігі, қызмет көрсету сапасы, сондай-ақ киберқауіпсіздік пен деректердің құпиялылығының сақталуы ескерілген.
