Түркістанда ҚР Ауыл шаруашылық ғылыми академиясы және Түркістан облысы кәсіпкерлер палатасы арасында түзілген меморандум аясында «Ясауи білім тарату орталығының» ресми ашылуы өтті.

Дөңгелек үстел форматында жалғасқан кездесуге ҚР АШҒА академиясының президенті Тілектес Исабайұлы, М.Әуезов атындағы ОҚМУ профессоры, ауыл шаруашылығы ғылымдарының докторы Жәнібек Әнуарбекұлы, облыстық ауыл шаруашылығы басқармасы басшысының орынбасары Ербұлан Әуелбекұлы, агроөндіріс саласының өкілдері мен шаруалар қатысты.

Аталған орталықтың мақсаты – ауыл шаруашылығы саласында дақылдарды органикалық негізде өсіру, өсімдіктердің өсіп-жетілу кезеңінде атқарылатын агротехнологиялық шараларын оңтайлы мерзімде жүргізу аркылы демонстрациялық алаңда дақылды өсіру. Соңғы жылдары фитосанитариялық ахуалдың күрделеніп кетуіне маңыз бере отырып, зиянды организмдерге қарсы күрес шараларын күшейту.

«Агроөнеркәсіптік кешен – ел экономикасының негізгі салаларының бірі. Импортқа тәуелділікті азайтып, халқымызды отандық азық-түлікпен қамтамасыз ету үшін өнімділікті арттырып, ішкі ресурстарды тиімді пайдалану қажет. Кәсібі білікті кадрлардың жеткіліксіздігі мен ғылымды қолдану өсімдік шаруашылығының көрсеткіштерінен де байқалады. Сол үшін ең алдымен шаруалардың білімін арттыру маңызды. Орталық осы бағытта фермерлердің кәсіби біліктілігін арттырып, озық заманауи агротехнологияларды меңгеруіне септігін тигізетін болады», -деді «Агро-кеңес беру орталығы» жетекшісі Нұрлыбек Боранбаев.

Айта кетерлігі, биыл елімізде 60 мыңға жуық бизнес жоба мемлекеттік қолдау алады. Бизнесті мемлекеттік қолдаудың сұранысқа ие шараларының бірі «Бизнестің жол картасы» және «Қарапайым заттар экономикасы» бағдарламаларының құралдары болып отыр. Атап айтқанда, өткен жылдың қорытындысы бойынша кредит сомасы шамамен 1 трлн теңгені құрайтын 12 мыңнан астам бизнес жобасы кредиттерді субсидиялау арқылы жеңілдетілген қаржыландыру шараларымен қамтылды. 340 млрд теңге сомасына 8 мың жоба бойынша кепілдік берілді.

Қаржылық емес қолдау аясында 10 мыңға жуық кәсіпкер оқытылды, кәсіпкерліктің түрлі мәселелері бойынша 166 мыңнан астам кеңес берілді. Биыл бюджетте шағын және орта бизнестің 40 мың жалғасып жатқан және 20 мың жаңа жобасын қолдауға қаражат көзделген.

Түркістан облысы кәсіпкерлер палатасы директорының орынбасары Нұрбол Рысбековтің айтуынша, жобадан күтілетін нәтиже – ғылым мен шаруа қожалықтары арасында байланыс орнату арқылы ауыл шаруашылығы саласының өнімділігін арттыру. Агроөнеркәсіптік кешен саласындағы инновациялық жобаны облыс деңгейінде ары қарай таралуына қолдау білдіру маңызды.

Жиынға қатысушылар осы бағытта жобаларды бірге іске асыруға белсенді қатысуға келісті.

Еске сала кетсек, Қазақстанда өнеркәсіпті цифрландыру үшін геологиялық ақпарат жинақталған платформа құрылды.

Бұл орайда, таяуда Қазақстанның Цифрлық даму, инновациялар және аэроғарыш өнеркәсібі министрі Бағдат Мусин “Digital Almaty-2024” алаңында брифинг өткізіп, журналистердің сауалына жауап берген болатын.

“Бұрын геологиялық ақпарат дөңесшелерде және кеңес дәуірінің архивтерінде сақталған. Қазір мұның бәрі сканерленіп жатыр. Қазірдің өзінде осындай 30 мың есепті сканерлеп, геокординаттарға байлап, порталға қолжетімді етіп шығардық. Жер қойнауына қызығушылық танытатын компания енді тиісті құрылымдарға барып жүруге міндетті емес, бар болғаны Minerals.gov.kz порталына тіркеліп, қажетті ақпаратты ала алады. Сондай-ақ, онда лицензия алуға, жер қойнауын пайдалану құқығын алу үшін өтінім беруге және, әрине, есептерді және басқа да ақпаратты тапсыруға болады”,  – деді министр.

Бағдат Мусин басқа мемлекеттердің отандық цифрлық шешімдерге айтарлықтай қызығушылық танытқанын айтты.

“Қазақстан Республикасы электронды үкімет бойынша әлемде 28-орынды, ал онлайн сервистер бойынша 8-орынды алады. Бұған дәлел – басқа ел өкілдерінің біздің қандай әрекет ететінімізді, мемлекет пен бизнес арасындағы және мемлекет пен азаматтарымыз арасындағы ортаны жақсарту үшін қандай жаңа шешімдер қабылдайтынымызды білу үшін IT-форумдарға келуі”, – деді Бағдат Мусин.