Бүгінде Түркістан облысында өндірісті дамыту, өндіру немесе өңдеу өнеркәсібі кеңінен етек жайып, дамып келе жатыр. Осы орайда өңірдегі аудан, ауылдарда да әртүрлі салалар бойынша өнім өндіріп, кәсіп ашқандар қаншама. Соның бірі Ордабасы ауданында кәсіп ашып, өз ісін жандандырып отырған Бөген ауыл округінің тұрғыны жеке кәсіпкер Жанболат Әлімқұлов. Ол өз қаражаты есебінен термопанель жасайтын цех ашып, кәсібін дөңгелетіп отыр. Қазіргі таңда алты адам жұмыспен қамтылған. Күніне 30 шаршы метрге жуық өнім шығарылады. Осылайша бір айда төрт үйдің сыртын қаптауға жетерлік құрылыс материалы өндіріледі. Кәсіпкер термопанель өндірісі үшін басын тәуекелге тігіп, қыруар қаржы жұмсаған. Бүгінде құйылған қаражат өзін ақтап, табысы еселенген. Ол ең алғаш мұндай кәсіп түрін әлеуметтік желіден көріп, қызығушылығы оянған.
Сонымен қатар, Ордабасы ауданы Шұбар ауыл округі, Тоқсансай елді мекенінің тұрғыны Ұлжалғас Аманбекова «Ауыл аманаты» бағдарламасы аясында өз кәсібін ашқан. Бастапқыда ірі қара мал басын бордақылау бағытында 8,6 млн теңге несие алуға мүлкін кепілге қойып, өтінім жолдаған. Нәтижесінде комиссияның оң шешімін алған. Кәсіпкер несие қаржысына Жамбыл облысынан 23 бас ірі қара мал әкеліп, шаруашылығын бастаған. Алдағы уақытта ірі қара мал басын бордақылап, ет өнімдерін ұлғайтуды жоспарлап отыр.
Айта кетсек, «Ауыл аманаты» жобасы аясында пилоттық жобаға қатысқан Шұбар ауыл округі бойынша «Шұбар-1» АӨК-ке 92 азамат несие алуға тіркелген. Олар түрлі бағыт бойынша несие алуға өтініш берген. Оның ішінде мал бордақылаумен айналысуға – 82, құс шаруашылығына – 1, балық шаруашылығына – 5, өсімдік шаруашылығына – 3, омарташылыққа (бал арасын өсіру) – 1 және өз кәсібін ашуға бағыты бойынша 4 азамат несие алуға ниет білдірген. Бүгінде 72 азаматтың жобасы облыстық комиссия қарауынан өтіп, 60 жоба қаржыландырылған. Оның 56-ы – мал бордақылау, 2 жоба – өсімдік шаруашылығы, 2-і – өзге бағыт бойынша.
Сонымен қатар, Келес ауданы Абай ауылының тұрғыны – Гүлжан Әбдімәлікқызы 27 жасында өз кәсібін ашып, 15 адамды жұмыспен қамтып отыр. Бүгінде ол “Saf” шаруашылық сабын өндірісінің директоры. Кәсіпкер иіс сабын, сұйық сабын, шаруашылық сабын өндіруді 2018 жылы қолға алған. Шағын ғана сарайда орналасқан цехта айына 10-30 тонна өнім дайындалады. Ендігі кезекте кәсіпкер сусабын өндірісіне 3 гектар жер алуды жоспарлаған. Цехта қазір сусабынның бірнеше түрі дайындалады. Айна-терезе жуатын, ыдыс жуатын сұйықтықтардың сапасы да шетелдік өнімдерінен кем емес.
Бәйдібектік кәсіпкер Бауыржан Молдабеков мемлекеттен 1 млн 380 мың теңге көлемінде қайтарымсыз грант алып, көлік жөндеу орталығын ашқан. Сондай-ақ, ол қажетті құрал-жабдықтарын да толық сатып алған.
-Мемлекеттен қайтарымсыз грантты жеңіп алып, жеке кәсібімді бастағаныма қуаныштымын. Орталық ашылғаннан бері келушілер саны артып жатыр. Қызметке жүгінушілердің көпшілігі аудан тұрғындары. Алдағы уақытта кәсіпті ұлғайтып, аудан азаматтарын жұмыспен қамтуға әрекет жасаймыз,- дейді Бауыржан Молдабеков.
Кентау қаласына қарасты Хантағы ауылының тұрғыны Мұхит Жанегізов «Ауыл аманаты» бағдарламасының қолдауымен жеке шаруашылығын ашқан. Ол 6 миллион теңге несие алып, он алты жылқы сатып алған. Алдағы уақытта мал санын көбейтіп, ет бордақылауды қолға алмақ. Бүгінде шаруашылығының көлемі ұлғайып, етке тапсырыс көбейген.Дәл осындай кәсіп түрін қолға алған ауыл тұрғыны Іңкәрбек Қасымбеков. Шаруа иесі мемлекеттен 5 млн теңге несие алып, оған 14 бас жылқы сатып алған. Жиырма жылдан бері екі-үш малды бордақылап, ет өңдеумен айналысып келген. Қазіргі таңда жылқы басын көбейтіп отыр.Бүгінде екі шаруаның ісі отбасылық кәсіпке айналған. Олар кәсіп көлемінің ұлғаюына байланысты ет өнімдерін Кентау қаласынан бөлек, Шымкент, Алматы қалаларына жіберуді қолға алған.
Ордабасылық тұрғын Айжан Егембердіқызы мемлекеттен 1 млн 380 мың теңге көлемінде қайтарымсыз грант алып, жеке тігін цехын ашқан.
Кәсіпкер грант қаражатына шеберханаға қажетті тігін машиналары мен оның қосалқы бөлшектерін сатып алған. Бүгінде көпбалалы ана арнайы тапсырыспен ұлттық нақышта безендірілген киімдерді тігеді. Оның ішінде мектеп оқушылары мен балабақша тәрбиеленушілеріне де арналған киімдер бар.
-Бүгінде мемлекеттік гранттар көптеген азаматтардың кәсіп бастауына өз септігін тигізіп келеді. Мен де осы орайда өз кәсібімді ашуды ұйғарып, құжаттарымды тапсырған болатынмын. Қазіргі таңда кәсібіме қажетті құралдарымның барлығын сатып алып, оның дамуына ерекше мән беріп келемін. Алдағы уақытта басқа да тігіншіліктің түрлерін үйренгім келеді. Одан бөлек, тігін кәсібін үйренемін, дамытамын деген жастарға үлгі көрсетіп, оларды үйрету жоспарымда бар,- дейді кәсіпкер.
Бүгінде жеке кәсіп ашамын деген азаматтарға мемлекет тарапынан қолдау көп. «2021-2025 жылдары кәсіпкерлікті дамытуға арналған ұлттық жоба» шеңберінде мемлекеттік грант алып, өңірлерде кәсібін бастағандар саны күн сайын артып келеді. Соның бірі түлкібастық Әмірхан Айтеков. Ол мемлекеттен қайтарымсыз грант алып, жылыжайда құлпынай өсіруді қолға алған.
«Қазір кәсіптің көзін тапқандар ауылдық жерлерде өте көп. Мен де өз кәсібімді дамыту үшін мемлекеттен қайтарымсыз грант алып, құлпынай өсіріп жатырмын. Жылыжайда құлпынайдан бөлек, пияз, сарымсақ және түрлі аскөктерді де егеміз. Қазіргі таңда құлпынайларды әр екі ай сайын жинап алып, аудандағы дүкендерге өткіземіз»,- дейді кәсіпкер.
