Бүгінде еліміздің IT саласында 16 мыңға жуық компания жұмыс істейді. Осы салада еңбек ететіндер саны 182 мың адамға жетті. 2023 жылдың бірінші жартыжылдығында IT қызмет экспорты 247 млн доллардан асқан.
Ал Дрейпер университетімен бірлесіп жүзеге асырылған бағдарламаға 27 жоба қатысқан. Қатысушы компаниялардың бірі «Ciix» Тим Дрейперден 1 млн доллар инвестиция тартты. Ал «Google for Startups» компаниясымен бірлесіп ұйымдастырылған бағдарламаға 24 жоба қатысты. Бағдарламаның нәтижесінде, компаниялар 4,2 млн доллар жинап, жалпы бюджеті 87,6 млн долларды құрады, ал айлық табыс көлемі 535 мың долларға жетті.
Сондай-ақ, еліміздегі құқық қорғау саласын дамыту мақсатында цифрлық сот талдауы енгізілетіні де айтылған.
Жоғарғы сот өкілдерінің айтуынша, ІТ-технология азаматтардың конституциялық құқықтары мен еркіндігін тиімді әрі жедел қорғауға мүмкіндік береді. Сот төрелігі адамдар мен бизнес үшін барынша қолжетімді әрі ашық бола түсті.
Бұл тұрғыда біріншіден, коронавирус пандемиясы соттардың жұмысына түзету енгізген. Жедел түрде процесс қатысушыларының қауіпсіздігі мен сот төрелігіне қолжетімділікті қамтамасыз ету арасындағы теңгерімді табу қажеттігі туындаған. Осы орайда сот жүйесін цифрландыру жеделдеп, бейнеконференцбайланысының қосымша ұтқыр серверлері орнатылған. Байланыс арналарының өткізу қабілеті артып, бұл соттарға қашықтан жұмыс істеу форматына көшуге мүмкіндік берген.
Екіншіден, барлық сот қызметтеріне бірыңғай электронды терезе арқылы қолжетімділік бар. Кез келген гаджеттен мобильдік қосымша арқылы соттарға 100-ден астам электронды өтінім жіберуге болады. Өтінімнің тіркелгенін қашықтан көріп, оның мәрбесін білуге және сот актісін алуға мүмкіндік жасалған.
Үшіншіден, сот отырыстарының барлық залы заманауи аудио және бейнетіркеу жүйесімен жабдықталған. ІТ-сервистер адамдардың соттармен өзара іс-қимыл жүйесін өзгертіп, мұнан ары ілгерілеуге мүмкіндік берді. Біздің жаңа ІТ өніміміз – бұл цифрлық сот талдауы. Ол біркелкі сот тәжірибесін қалыптастыруға көмектеседі. Онда алғаш рет жасанды интеллект элементтері қолданылады.
